Bir máıittik donor kemi 4 nemese tipti 7 adamnyń ómirin arashalaı alady - mamandar.
Bul máseleniń saldarynan donorlyq organdy qajet etetin 3800-deı azamattyń 300-ge jýyǵy ótken jyly saý aǵzaǵa qoly jetpesten qaıtys bolǵan. Soraqysy sol, donor tapshylyǵynyń azabyn tartyp otyrǵandardyń 100-ge jýyǵy 18 jasqa deıngi bala, dep habarlaıdy Almaty-akshamy.kz.
24.kz aqparaty boıynsha, Qazaqstanda aǵza aýystyrýdy qajet etetinderdiń arasynda birinshi orynda búıregi syr bergender tur. Ekinshi kezekte júrek, odan soń baýyr men uıqy bezin almastyrǵysy keletinder tur. Mamandar "bir máıittik donor kemi 4 nemese tipti 7 adamnyń ómirin alyp qalar edi" deıdi. "Biraq bizdegi tanym-túsinik saldarynan kóbisi odan at-tonyn ala qashady. Osydan keıin aýrýmen betpe-bet kelgenderge tek jaqyndary qol ushyn sozyp, aǵzasyn bólip bermese, kelmeske ketkenderdiń saý aǵzasyn paıdalanyp qalýǵa eshkim asyqpaıdy",- dep nalıdy mamandar. Elde Densaýlyq saqtaý mınıstrliginiń buıryǵymen 40 donorlyq aýrýhana bekitilgen. Sońǵy 10 jylda transplantasıalaý búrosyna tek 175 adam ǵana kelisim berip, ótinish qaldyrypty.
«Halyq arasynda aǵartý jumystaryn júrgizip, dárigerlerdi oqytyp jatyrmyz. Máıittik donor endi óte tómen deńgeıde. Jasalǵan barlyq transplantasıanyń 15 paıyzy ǵana máıáttik donordan jasalǵan. Bizde bir ǵana qıyndyq - ol donorlyq organ defısıti. Adamdar kelisim bermeıdi. Sondyqtan kútý paraǵyndaǵy azaımaıdy, kerisinshe, kóbeıip jatyr», - deıdi QR DSM "Transplanttaýdy úılestirý jáne joǵary tehnologıalyq medısınalyq qyzmet jónindegi respýblıkalyq ortalyq" dırektory Sáýle Shaısultanova.