Olardyń kóbi jumys izdep shyqqan.
Bıyl Qazaqstannan syrtqa 2 myńǵa jýyq otandasymyz qonys aýdarǵan, dep habarlaıdy Almaty-akshamy.kz Ulttyq statısıka búrosyna silteme jasap.
Biri – jalaqysy jaqsy jumys izdese, endi biri turaqtap qalýdy maqsat etkender.
Shetel shekarasyn asatyndardyń kóbi jastar eken. Til biletin bolǵan soń, eldegi jalaqy olardyń oń jambasyna kele bermeıtin kórinedi. «Al bulaı jalǵasa berse, elden ketýdiń keri áseri kóp»deıdi májilismen Asqat Aımaǵambetov. Depýtat bul jaǵdaıdyń birneshe sebebi bar dep paıymdady. Birinshiden, kúnkóris, tabys máselesi bolsa, ekinshiden, elikteýshilik.
«Bizde suranystaǵy mamandardy qalyptastyrý úshin memleket kóp kúsh jumsaıtyny belgili. Muǵalim, dárigerlerge qazir barlyq jaǵdaı jasalyp jatyr. Suranystaǵy kadr el ekonomıkasyna, onyń ósýine óz kómegin tıgizedi. Al tap osy mamandyq ıeleri shetelge ketetin bolsa, bul – úlken shyǵyn. Qazaqstandyqtardyń ózge memleketterge kóshýge beıim bolýyn jan-jaqty saralaý kerek», – dedi QR Parlamenti Májilisiniń depýtaty Asqat Aımaǵambetov.
Resmı derekke súıensek, bıyl 2 aıda elden 2 myńǵa jýyq otandasymyz syrtqa ketipti. Olar Reseıge, al 20 paıyzdan astamy Germanıaǵa qonys aýdarypty. Qalǵan qazaqstandyqtar Polsha, AQSH, Ózbekstan jáne Belarýs eline taban tiregen.
«Turaqty turý úshin emıgrasıa boıynsha negizgi memleketter, birinshi - ol Reseı. Onda shetelge ketkenderdiń 62 paıyzy osy memleketke tıesili. Germanıaǵa 21 paıyz jerlesimiz qonys aýdardy» – dedi Ulttyq statısıka búrosynyń sarapshysy Bıbigúl Mırasbek.
Jyl saıyn elden ketken azamattardyń sany artyp barady. Ulttyq statısıka búrosynyń málimetinshe, ótken jyly 24 myńǵa jýyq adam shet memleketke turaqty turýǵa kóshipti. Al eki jyl buryn respýblıkany 32 myń otandasymyz tastap ketken.