Ata-analar endi balalaryna arnaıy SIM-karta aldyrýy múmkin.
Bul eń aldymen jetkinshekterdiń kıberqaýipsizdigin qamtamasyz etý úshin qajet. Tyń bastamany oqý-aǵartý vıse-mınıstri Edil Ospan osydan birer apta buryn kótergen edi, dep habarlaıdy aqshamnews.kz 24.kz-ke silteme jasap.
Balalarǵa arnalǵan tarıfi bar SIM-karta engizý arqyly Oqý-aǵartý mınıstrligi birqatar máseleni sheshpekshi. Atap aıtqanda, ata-ana baqylaýyn kúsheıtý, jetkinshekterdiń kıberqaýipsizdigin saqtap, jaǵymsyz kontentten shekteý jáne balanyń qaı jerde júrgenin anyqtaý jeńildeı túspek. Taldaý kórsetkendeı, qazaqstandyq balalar ınternetke kóbine smartfon arqyly qol jetkizedi eken. «Demek bul bastamanyń mańyzy zor», – deıdi oqý-aǵartý vıse-mınıstri Edil Ospan.
Edil Ospan, QR oqý-aǵartý vıse-mınıstri:
- Bizdiń oıymyzsha, osy SIM-kartalar arqyly balalarǵa kelip túsetin aqparatty belgili bir súzgiden bolady dep sanaımyz. Qazirgi kúnde bul másele mamandarmen pysyqtalyp jatyr. Sheteldik tájirıbe mindetti túrde zertteldi. Kóptegen shetelde osy baılanys operatorlary sım karta arqyly, ondaǵy arnaıy tarıfter arqyly ondaǵy balalarǵa beriletin aqparat belgili bir súzgiden ótedi. Iaǵnı belgili bir zıandy, densaýlyǵyna, psıhıkasyna zıandy aqparat. Sol úshin baılanys operatorlary ony tejep, shektep otyrady.
Jalpy Oqý-aǵartý mınıstrligi balalardy zıandy aqparattan qorǵaý týraly 2018 jyly qabyldanǵan zańnamany jetildirý bastamasyn kótergen. Búginde quzyrly organ tıisti saraptamalyq jumystardy júrgizip jatyr. IT jáne komýnıkasıalar jónindegi táýelsiz sarapshy Evgenıı Pıtolın balalar tarıfin engizý úshin arnaıy zań jobasy qajet emes degen pikirde.
Evgenıı Pıtolın, IT jáne komýnıkasıalar jónindegi táýelsiz sarapshy:
- Bul tyń ıdeıa emes. Ony baılanys operatorlarynyń arnaıy tarıfteri arqyly júzege asyrýǵa ábden bolady. Jalpy balalardyń kıberqaýipsizdigi úshin bul durys bastama dep esepteımin. Menińshe, buǵan arnaıy zańnyń qajeti de joq. Bul jerde bastysy uıymdastyrýshylyq, tehnologıalyq jáne marketıńtik sheshimderdiń utymdyǵyn oılastyrǵan jón.
Ol úshin Sıfrlyq damý, ınovasıa jáne aeroǵarysh ónerkisibi mınıstrligi baılanys operatorlarymen birlese, tıimdi joba qurýǵa tıis. Quzyrly organǵa Oqý-aǵartý mınıstrliginiń osy bastamasyna qatysty saýalymyzdy joldaǵan edik. Biraq sıfrlyq damý mınıstrligi tolyqqandy jaýap berýge ázir daıyn bolmaı shyqty. Sebebi ony jan-jaqty taldap, uıaly baılanys operatorlarymen kelisimge kelgenshe biraz ýaqyt qajet. Demek balalar tarıfiniń naqty qaı ýaqytta iske qosylatynyn bilý ázir múmkin emes.