Kezdesýde Nursultan Nazarbaev eki memleket arasyndaǵy yntymaqtastyqtyń joǵary deńgeıin atap ótti.
«Qazir biz kúrdeli kezeńdi ótkerip jatyrmyz. Qazaqstan men Reseı koronavırýstyń taralýyna jáne onyń ekonomıkaǵa tıgizetin saldaryna baılanysty qıyndyqty birlese eńserýde. Jýyrda Vladımır Pýtınmen kezdesip, ózara keńestik. Jumysty ári qaraı jalǵastyramyz», – dedi Elbasy.
Elimizdiń Tuńǵysh Prezıdenti ekijaqty qatynastardy nyǵaıtý jáne Eýrazıa ekonomıkalyq odaǵy aıasynda óńirlik yqpaldastyqty odan ári damytý máselelerine toqtaldy.
Mıhaıl Mıshýstın Nursultan Nazarbaevqa qonaqjaılyǵy úshin rızashylyǵyn bildirip, Reseı Federasıasy Prezıdentiniń jyly lebizin jetkizdi.
Reseı Federasıasy Úkimetiniń tóraǵasy Qazaqstanǵa sapary aıasynda júrgizgen kelissózder men kezdesýlerdiń nátıjesi týraly aıtyp berdi.
«Biz ekijaqty kún tártibindegi máselelerdi jan-jaqty talqyladyq. Osy jyldyń birinshi jartysynda eki el arasyndaǵy taýar aınalymy 34 paıyzǵa óskenin atap ótken jón. Bul kórsetkish pandemıaǵa deıingi deńgeıden 20 paıyzǵa artyq. Jyl sońyna deıin 20 mıllıard dollardan astam mejege qol jetkizgimiz kelip otyr», – dedi M.Mıshýstın.
Reseı Federasıasy Úkimetiniń tóraǵasy Qazaqstanda sıfrlandyrý salasynda qabyldanǵan sheshimderge qatysty pikirin bildirdi. Sondaı-aq koronavırýs ınfeksıasynyń taralýyna qarsy birlesken sharalardy júzege asyrý máselesine toqtaldy.
«Keshe «elektrondy úkimetke» arnalǵan ortalyqty araladym. Jumys óte tıimdi uıymdastyrylǵan. Sizder úshin de ashyq ekenimizdi aıtqym keledi, bizdiń eshqandaı qupıamyz joq: Reseı Úkimetiniń úılestirý ortalyǵynda atqarylǵan jumysty árdaıym kórsetip júrmiz. Biraq sizderdiń sońǵy zamanaýı jańalyqtardy jyldam engizip jatqandaryńyz meni tań qaldyrdy. Koronavırýsqa keler bolsaq, biz bul qaterli vırýsqa qarsy kúreste qoldan kelgenniń bárin jasap jatyrmyz. Búginde «Sputnik V» vaksınasy Qaraǵandy farmasevtıkalyq zaýytynda jasalady. Onyń 5 mıllıon dozadan astamy shyǵaryldy. Bul – úlken jumys. Qoryta aıtqanda, biz baýyrlas tatý kórshilik qatynastardy joǵary baǵalaımyz. Aldaǵy ýaqytta da ekijaqty yntymaqtastyqty, sondaı-aq Eýrazıa ekonomıkalyq odaǵy aıasyndaǵy qarym-qatynasty jan-jaqty damytqymyz keledi», – dedi M.Mıshýstın.