Sottan tys banrottyq rásimi kezinde tirkelgen adamdardyń 70 paıyzynyń ótinishi ne sebepti keri qaıtaryldy?
Bul týraly qarjy vıse-mınıstri Erjan Birjanov aıtyp berdi, dep habarlaıdy Almaty-akshamy.kz.
«Qazirgi kezde 49 myńnan astam ótinish kelip tústi. Onyń 36 myńy keri qaıtaryldy. 6 myń ótinishti qabyldap úlgerdik, jarty jyldyń ishinde olar bankrot dep tanylýy múmkin. Keıbir ótinimder áli de qaralyp jatyr, óıtkeni ótinish 15 jumys kúni ishinde qaralady», - dedi E. Birjanov Senatta tilshiler suraǵyna jaýap bere otyryp.
Onyń aıtýynsha, ótinishterdi keri qaıtarýdyń negizgi sebebi sottan tys bankrottyq rásimine qatysty bolyp tur. Atap aıtqanda, ótinish bergen adamdardyń qaryzy shekti soma 1600 AEK-ten asyp otyr. Taǵy bir másele, keıbir ótinish berýshiler jartylaı bankrotqa ótkisi keledi, ıaǵnı ıpoteka boıynsha keredıtin tólep jatqany anyqtaldy. Kóp jaǵdaıda ótinish bergen adamdardyń menshiginde múlik, avtokólik, jer ýchaskeleri bar ekeni belgili boldy. Osy derekter sottan tys banrottyqty rásimdeý kezinde anyqtaldy.
Vıse-mınıstr ótinishterdi keri qaıtarý qalypty jaǵdaı ekenin jáne bul kórsetkish 70 paıyzdy quraǵanyn aıtty. Tıisti zańdy ázirleý kezinde halyqaralyq tájirıbe, sonyń ishinde batys elderindegi talaptar zerttelgen.
«Atap aıtqanda, bastapqyda adamdardyń bankrottyq týraly ótinishi qabyldanbasa, úsh aıdan keıin azamattar qaıta ótinish berýge quqyly. Proses júrip jatyr. Eki aıda 50 myńǵa jýyq ótinish kelip tústi. Meniń oıymsha, bul óte jaqsy kórsetkish jáne qarjylyq jaǵdaıdy jaqsartýǵa jaqsy múmkindik berilip otyr», - dedi Erjan Birjanov.
Eske salaıyq, bıyl 3 naýryzda elimizde bankrottyqqa ótinim qabyldaý bastaldy.