Atalǵan sall-ortalyq elimizdiń barlyq psıhıkalyq densaýlyq ortalyqtaryn biriktiretin bolady.
Medısınalyq-áleýmettik kómekke muqtaj qazaqstandyqtarǵa konsýltasıalyq, psıhologıalyq qoldaý kórsetý úshin biryńǵaı sall-ortalyq qurylady. Bul týraly QR Densaýlyq saqtaý mınıstrliginiń shtattan tys bas psıhıatr-narkology Qýanysh Altynbekov aıtty, dep habarlaıdy Almaty-akshamy.kz QazAqparatqa silteme jasap.
"Ókinishke oraı, «Ońaltý bólimsheleri qaı jerde jumys isteıdi, kómekti qalaı alýǵa bolady, bul bólimshelerge qalaı barýǵa bolady?» degen aqparatty halyq bile bermeıdi. Atalǵan sall-ortalyq elimizdiń barlyq psıhıkalyq densaýlyq ortalyqtaryn biriktiretin bolady", - dedi Qýanysh Altynbekov Ortalyq komýnıkasıalar qyzmetinde ótken baspasóz máslıhatynda.
Sondaı-aq, onyń aıtýynsha, elimizde óńirlik psıhıkalyq densaýlyq ortalyqtary bar. Olarda esirtkige táýeldi pasıentterdi medısınalyq-áleýmettik ońaltýdyń úsh kezeńdik baǵdarlamasymen emdeıtin bólimsheler jumys isteıdi. Qazirgi ýaqytta osy bólimshelerdi keńeıtý jumystary júrgizilip jatyr. Olarda esirtkige táýeldilikten arylýǵa, áleýmettik daǵdylardy qalpyna keltirýge, sondaı-aq esirtkini qaıta paıdalanýǵa tózimdilikti qamtamasyz etetin jeke qasıetterdi damytýǵa baǵyttalǵan medısınalyq jáne áleýmettik is-sharalar júrgiziledi.
Búgingi tańda úsh kezeńdi ońaltý 7 óńirde jumys isteıdi: Aqmola, Qostanaı, Pavlodar, Túrkistan, Aqtóbe oblystarynda jáne Nur-Sultan, Shymkent qalalarynda. Barlyq kómek tegin medısınalyq kómektiń kepildik berilgen kólemi aıasynda kórsetiledi.
«Qazan aıynda Soltústik Qazaqstan oblysynyń psıhıkalyq densaýlyq ortalyǵynda bólim ashylady. Osy jyldyń sońyna deıin basqa óńirlerde osyndaı bólimshelerdiń ashylatyndyǵy josparlanǵan», - dedi ol.