«Almaty jastary» muǵalimder men dárigerlerge arnaıy kvotany engizedi
Jas muǵalimder men dárigerler úshin «Almaty jastary» ıpotekalyq baǵdarlamasy boıynsha arnaıy kvota engiziledi. Bul týraly Almaty pedagogteriniń tamyz forýmynda qala ákimi Erbolat Dosaev málimdedi, dep habarlaıdy Almaty-akshamy.kz.
Forýmda muǵalimderdi qoldaý jáne pedagog mártebesin arttyrýǵa arnalǵan is-sharalar men múmkindikter de aıtyldy.
«Bizde «Almaty jastary» qalalyq baǵdarlamasy bar. Jyl saıyn 1000 adamnyń turǵyn úı satyp alý úshin arnaıy qarjylyq jaǵdaı jasaımyz. Baǵdarlama keń tanylǵan, buǵan jyl saıyn kóptegen úmitker qatysady. Sol sebepti men áriptesterimmen aqyldasyp, kelesi jyldan bastap jas muǵalimder men dárigerler úshin arnaıy kvota engizetinimizdi málimdeımin. 1000 adamǵa taǵy 100 kvota qosylady: 50-i jas muǵalimderge, 50-i jas dárigerlerge», - dedi qala ákimi.
Buǵan qosa, ákim qarjylyq múmkindik bolǵan kezde, mamandyq pen jas muǵalimderdiń damýy úshin qosymsha is-sharalar qabyldaýǵa jáne baǵdarlamany keńeıtýge ýáde berdi.