Qazaqstandyqtar jylyna ortasha eseppen 4 kelideı balyq jeıdi.
Dúnıejúzilik densaýlyq saqtaý uıymynyń talaby boıynsha bir adam tutynatyn balyq mólsheri 16 keli bolýǵa tıis, dep habarlaıdy aqshamnews.kz.
24.kz arnasynyń aqparatyna saı, elimizdegi balyq sharýashylyǵynyń áleýetine qaramastan, kórshi Qyrǵyzstan men Ózbekstandaǵy balyq tutyný kórsetkishi bizden joǵary.
Osy olqylyqtyń ornyn toltyrý úshin 2021 jyly «Balyq sharýashylyǵyn damytý» baǵdarlamasy qabyldanǵan edi. Alaıda qordalanǵan máselesi kóp salany ilgeriletý úshin áli de birqatar zańnamalyq túıtkildi sheshý qajet. Qazir Májiliste «Akvaósirý» týraly arnaıy zań jobasy qaralyp jatyr.
Qazaqstan jylyna 25 myń tonna balyq eksporttaıdy. Al elimizge syrttan ákelinetini budan eki ese kóp – 50 myń tonna. Osyǵan qaramastan, ár adamnyń jyldyq tutyný kórsetkishi álemdik standarttan 4 ese az.
Sergeı Ponomarev, QR Parlamenti Májilisiniń depýtaty:
- İri ınvestorlarǵa Kaspıı teńizindegi aýqymdy ýchaskelerdi eshbir baıqaýsyz berýdi usynyp otyrmyz. Mundaǵy talap – ınvestısıa kólemi 500 mln teńgeden asý kerek. Al daıyn sharýashylyqty keńeıtýge, jóndeýge budan kem mólsherde qarjy quıýǵa bolady. Sonymen qatar sý qoımalaryn jalǵa berý merzimin uzartýdy usynyp otyrmyz. Buǵan deıin 5 jyldan 25 jylǵa deıin berilse, endi 10-nan 49 jylǵa deıin uzartýdy usynamyz.
«Al kólderdi jalǵa alýyn alyp, 5 jyl boıy balyq sharýashylyǵyn órbitpegen sýbektilerdi akvaósirý jobasyna jolatpaımyz», - deıdi depýtat. Aıta keterligi, «Balyq sharýashylyǵyn damytý» baǵdarlamasy iske qosylǵaly úsh jylda mundaı sharýashylyq sany 180-nen 500-ge deıin kóbeıdi. Demek, bıznes tarapynan qyzyǵýshylyq bar. Degenmen, zańnamalyq turǵydan rettelýge tıis másele de jetip artylady. Mysaly, paıyzdyq mólsherlemesi tómen nesıe joqtyń qasy. Jańa jobada balyq shabaqtary men jemine arnaıy jeńildik pen sý baǵasyn arzandatýǵa baǵyttalǵan sýbsıdıa qarastyrylyp otyr. «Sharýany dóńgeletýge kedergi keltirer taǵy bir másele bar – ol Sý kodeksine engizilgeli jatqan ózgerister», - deıdi balyq sharýashylyǵynyń basshysy Marlen Tursynáli.
Marlen Tursynáli, Balyq sharýashylyǵynyń basshysy:
Qazirgi usynyp otyrǵan Kodekste birqatar balyq sharýashylyǵyn damytýǵa kedergi keltiretin jaǵdaılar kodekste kórsetildi. Biz ony ashyq aıtyp jatyrmyz. Eger Sý kodeksi bizdiń balyq sharýashylyǵy aıtqan dúnıeni eskerilmeı qabyldanyp ketken jaǵdaıda bolsa, onda qazirgi myna balyq sharýashylyǵy damymaıdy degen oıdamyz.
Quzyrly vedomstvo bul máseleden habardar. Májilistegi jumys toby sharýashylyqtardyń múddesi mindetti túrde eskeriletinin aıtady. Ásirese, qurǵaqshylyq kezinde olardyń jumysyn júıeli jolǵa qoıý qajet-aq.
Almas Asylbekov, QR ASHM Balyq sharýashylyǵy komıteti tóraǵasynyń orynbasary:
Balyq ósirý sýbektileri úshin sý qorǵaý beldeýlerin paıdalaný máselesi týyndap otyr. Bul jerde balyq ósirý toǵandaryn, baseınderin salý, odan keıin balyq ósirý obektilerin qurý boıynsha máseleler... Sol máselelerdi jetildirý boıynsha Sý kodeksine birqatar ózgerister usynylyp otyr.
Balyq sharýashylyǵyn keshendi damytýda ǵylymnyń mańyzy zor. «Akvaósirý» týraly jańa zań jobasy ǵylymı negiz qurýdy mindetteıdi. Sondaı-aq arnaıy aqparattyq júıe túzý kózdelgen. Jobanyń Májilistegi birinshi oqylymy qarashanyń 20-syna, búgingi kúnge belgilengen.