Búdjet esebinen sý arnalary jaqsartylady
2025 jylǵa deıin el turǵyndary aýyz sýmen qamtamasyz etiledi. Bul týraly búgin Úkimet otyrysynda Indýstrıa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy Almaty-akshamy.kz QazAqparat-qa silteme jasap.
«Jergilikti atqarýshy organdar jergilikti búdjet qarajaty esebinen jarǵylyq kapıtalyn ulǵaıtý arqyly sý arnalarynyń materıaldyq-tehnıkalyq bazasyn jaqsartý jóninde is-sharalar qabyldaýy qajet. Memleket basshysy tapsyrmalarynyń iske asyrylýy jergilikti atqarýshy organdardyń birlesken jáne úılesimdi jumysyna tikeleı baılanysty», - dedi mınıstr.
Onyń sózine qaraǵanda, halyqty aýyz sýmen qamtamasyz etý máselesi Indýstrıa jáne ınfraqurylymdyq damý mınıstrliginiń turaqty baqylaýynda tur.
«Memleket basshysynyń halyqty bes jyldyń ishinde aýyz sýmen tolyq qamtamasyz etý týraly tapsyrmasy kezeń-kezeńimen 2025 jylǵa deıin oryndalatyn bolady», - dedi Qaıyrbek Óskenbaev.