Ulttyq qundylyqtar jańǵyrýda
QR Aqparat jáne qoǵamdyq damý mınıstrliginiń qoldaýymen «Qazaqstan» teleradıokorporasıasy túsirgen «Jáńgir han. Saraı syry», «Ahmet. Ult ustazy», «Domalaq ana», «Táshenev. Taıtalas», «Qanysh. Qazyna», «Muqaǵalı. Bul ǵasyrdan emespin» tarıhı telehıkaıalarynyń tanystyrylymy ótti, dep habarlaıdy Almaty-akshamy.kz
Teleradıokorporasıa bıyl túsirgen 16 otandyq serıaldyń 6-ýy tarıhı baǵytta jaryqqa shyqty.
Ult qaıratkerleri Ahmet Baıtursynuly, Jumabek Táshenev, Qanysh Sátbaev, Muqaǵalı Maqataev, Jáńgir han men Domalaq ananyń ómirine arnalǵan tarıhı týyndylar «Qazaqstan» arnasynyń efırinen Táýelsizdik merekesi qarsańynda berile bastaıdy.
Sharaǵa Premer-Mınıstrdiń orynbasary E.Toǵjanov, QR Aqparat jáne qoǵamdyq damý mınıstri Aıda Balaeva, depýtattar, televıdenıe salasynyń ardagerleri men jýrnalıser qatysty.
«Tarıhı serıaldardyń negizgi maqsaty – tarıhı tulǵalardyń ómir jolyn, sol zamannyń tynysyn kórsetý. Táýelsizdigimizdiń 30 jyldyǵynyń qarsańynda osy jobalardy kórermen nazaryna usynyp, halyqtyń júregine jete alsaq, sol kezeńderdegi árbir qıyn sátter men jeńisti kúnderdi búginmen úndestire alsaq, bul - úlken jeńis. Soǵan úlken qadam jasaldy», - dedi sharanyń ashylý saltanatyna qatysqan Premer-Mınıstrdiń orynbasary Eraly Toǵjanov.
Sharaǵa QR Aqparat jáne qoǵamdyq damý mınıstri Aıda Balaeva qatysyp, búginde otandyq serıal naryǵynda básekelestiktiń qalyptasqanyn atap ótti.
«Qazir bizdiń kınoındýstrıadaǵy óz jolymyz bar. Bul saladaǵy jumys jyldan-jylǵa qarqyn alyp keledi. Sońǵy 5 jyldyń ishinde 3500-den astam bólimnen turatyn 250-ge jýyq serıal túsirildi. Osydan 10 jyl buryn serıal daıyndaıtyn prodakshn-kompanıalar saýsaqpen sanarlyq bolsa, búginde bul salada báseke joǵary. Búginde tarıhı jobalar memlekettik telearna ónimderiniń 30%-yn quraıdy. Bıyl jyl aıaǵyna deıin tarıhı baǵytta 12 serıal kórermen nazaryna usynylady. Táýelsizdiktiń qunyn bilip, onyń qadir-qasıetin baǵalaý úshin, biz ótkenimizdi umytpaýymyz kerek. Tarıhta qandaı joldardan óttik, qandaı tulǵalar boldy barlyǵyn urpaqqa uǵyndyrý kerek. Sondyqtan da Prezıdent ult tulǵalaryn nasıhattaıtyn tarıhı serıaldardy kóbeıtýdi tapsyrdy. Osy serıaldar arqyly biz óskeleń urpaqqa tarıhı tulǵalar men olardyń ónegeli ómirin tanystyramyz», - dedi mınıstr óz sózinde.
12 bólimdi «Jáńgir han. Saraı syry» serıalyna Arman Sqabyluly, 6 bólimdi «Ahmet. Ult ustazy» telehıkaıasyna Murat Esjan, 2 bólimnen turatyn «Domalaq ana» telehıkaıasyna Nurıddın Pattev, 4 bólimdi «Táshenev. Taıtalas» serıalyna Jasulan Poshanov, 6 bólimdi «Qanysh. Qazyna» telehıkaıasyna Aıgúl Baıbek, 4 bólimdi «Muqaǵalı. Bul ǵasyrdan emespin» tarıhı týyndysyna Azamat Satybaldy jetekshilik etti.
«Korporasıanyń, jalpy, elimizdiń serıal óndirisi tarıhynda buǵan deıin bir jyl ishinde 6 kóp bólimdi tarıhı telehıkaıa túsirilgen joq. Sondyqtan bıylǵy jyl biz úshin úlken synaq pen tájirıbege toly jyl boldy. Eń bastysy, dál osyndaı táýekelder arqyly naryqta tarıhı serıal óndirisine mashyqtanǵan kompanıalar sany artyp, serıaldar úshin jańa beıneler qalyptasyp jatyr», - dedi basqarma tóraıymy Lázzat Tanysbaı sharanyń ashylýynda.
Basty keıipkerlerden bólek, serıaldarda Báıdibek bıdiń, Mahambet pen Isataı, Álibı Jangeldın, Mirjaqyp Dýlatuly, Jumabaı Shaıahmetov, Baýyrjan Momyshuly, Dinmuhamed Qonaev, Farıza Ońǵarsynovanyń rólderi kezdesedi.
Keńesshi-senarıster qatarynda jazýshy Medeý Sárseke, aqyn Ularbek Nurǵalym, Baqyt Bedelhan, Ulyqbek Esdáýlet, ahmettanýshy Raıhan Imahanbet, Muqaǵalı Maqataevtyń kelini Baqytgúl Maqataeva, Jumabek Táshenevtiń uly Saıan Jumabekuly men kelini Fatıma Sadyqqyzy bar.
Táýelsizdik merekesinde Ulttyq arna efırinen alǵash bolyp «Ahmet. Ult ustazy» telehıkaıasy shyǵady.
Sonymen birge Qazaqstan teleradıokorporasıasy 2022 jyly túsiriletin serıaldarǵa ashyq baıqaý jarıalap, qazir 188 joba qabyldady. Tarıhı ulǵalarymyzdyń ómirin, beınesin ekran arqyly dáripteý isinde alǵa qoıǵan maqsat-mindetimizge saı keler jyly Álıhan Bókeıhanov, Álkeı Marǵulan, Dına Nurpeıisova, Maǵjan Jumabaev týraly tarıhı jobalar túsirýdi josparlap otyrmyz. Ǵabıt Músirepovtyń «Ulpan» romanyn ekranızasıalaý maqsaty tur. Zataevıch pen Brýsılovskııdiń qazaq mýzyka mádenıetine sińirgen eńbegi de bir telehıkaıaǵa arqaý bolarlyqtaı. Bıyl sonymen birge korporasıanyń túrki elderine ortaq tulǵa «Qorqyt ata» tulǵasyna arnalǵan telehıkaıanyń shyǵarmashylyq jumystary bastaldy. Túrkıa serıal óndirýshilerimen birlese qolǵa alynǵan telehıkaıanyń túsirilimi úsh jylǵa jalǵasady.