Áýezov aýdanyndaǵy №202 mektep-gımnazıa oqýshylary Qalnıaz jyraýdyń «Er Qarmys» batyrlyq dastanyn jaryqqa shyǵaryp, óskeleń urpaq arasynda nasıhattaýǵa úles qosqan Sandýǵash Taǵabergenovamen kezdesti.
Maqsat – «SABU Productions» ortalyǵynyń bastamasymen oqyrmanǵa jol tartqan «Er Qarmys» batyrlyq dastanyn jas jetkinshekterge tanystyrý. Jas oqyrmanǵa arnalǵan bul týyndyda Er Qarmystyń erligi, halqymyzdyń ult bolyp qalyptasý jolyndaǵy tarıhı sátteri men jaýjúrek erlerdiń Otan aldyndaǵy janqıarlyq kezderi jan-jaqty baıandalady. Er Qarmys Bekbolatuly 1720 jyldary ómirge kelgen, dastanda onyń 75 jasynda jaýmen aıqasqany aıtylady. Batyr qartaıyp, úıde naýqastanyp jatqanda «shaıqasta erlikpen ólsem» dep armandaǵan eken. Keıin «jaý shapty» degende qolyna naızasyn alyp jaýǵa umtylǵan. Almaǵaıyp zamanda ómir súrgen batyr babamyz jaýmen shaıqasta erlikpen qaza tabady. Búgingi shákirt – erteńgi el qorǵaıtyn sarbazdyń jadyna «Otan úshin otqa tús, kúımeısiń» degen halyq danalyǵyn salǵandaı.
«Rýhanı jańǵyrý jolynda jas oqyrmannyń sanasyna shaqtap, kórkem sýretpen bezendirip burynǵy batyrlyq tarıhymyzdan syr shertetin dastandy qazirgi jastarǵa laıyqty etip shyǵarýdy uıǵardyq. Er Qarmys batyr – tarıhta bolǵan adam. Ol jaıynda kóptegen jyr jazylǵan, bahadúrdiń súıegi Mańǵystaý jerinde. Bul dastannyń birneshe nusqasy bar. Epos bizge aýyzsha jetse de, onyń túpnusqasyn taptyq. Kitapty shyǵarmas buryn dastandy eki jyldaı zerttep, zerdeledik. Mańǵystaýlyq marǵasqa aqyn, QR memlekettik syılyǵynyń ıegeri Svetqalı Nurjan osy nusqanyń ózgeriske ushyramaı jetkenin aıtty», – deıdi ıdeıa avtory Sandýǵash Taǵabergenova.
Er Qarmys kitabynyń 10 myń dana bolyp shyǵarylýyna demeýshilik etken «Sentr Kredıt banki». Kitaptyń tanystyrylymy barysynda oqýshylarǵa arnaıy syılyqtar men «Er Qarmys» kitaby tartý etildi.