Bul týraly Astanada densaýlyq saqtaý salasyndaǵy STADA Healt Report zertteýin tanystyrý barysynda belgili boldy.
Bul zertteý Qazaqstanda ekinshi ret uıymdastyrylǵan. Onyń aıasynda 16 memleket qamtylyp, ár elde shamamen 2 myń adam arasynda saýalnama júrgizildi. Jalpy, 16 elde 18-99 jas aralyǵyndaǵy 32 013 adam saýlnamaǵa qatysty, dep habarlaıdy Almaty-akshamy.kz QazAqparatqa silteme jasap
«Eýrazıa» óńirindegi STADA vıse-prezıdenti Armınas Masevıchýstiń aıtýynsha, Qazaqstanda respondentterdiń 38 paıyzy densaýlyq saqtaý júıesiniń deńgeıine qanaǵattanarlyq baǵa bergen. Alaıda qazaqstandyqtardyń 30 paıyzdan astamy turaqty tekserýden ótpeıtini anyqtalǵan. Bul rette turǵyndar qaı medısınalyq tekserýden ótý kerek ekenin bilmeıtinin aıtqan.
Bıylǵy zertteý derekterine qaraǵanda, saýalnamaǵa qatysqan qazaqstandyqtardyń 37 paıyzy túrli dárýmenderdi satyp alýǵa erekshe mán berip otyrǵany jarıalandy. Sonymen qatar adamdardyń 26 paıyzy densaýlyqqa paıdaly azyq-túlik ónimderin satyp alatyndaryn atap ótken. Respondentterdiń 19 paıyzy profılaktıkalyq medısınalyq tekserýden jıi ótetinin aıtyp otyr.
Skrınıngterdiń arasynda eń tanymal prosedýra gınekologıalyq tekserýge qatysty bolǵan, ıaǵnı Qazaqstanda áıelderdiń 80 paıyzy men eýropalyqtardyń 70 paıyzy osy dıagnostıkadan turaqty túrde ótedi eken. Munymen qosa, Qazaqstanda medısınalyq tekserýler arasynda ekinshi orynda jalpy qan analızi tur, adamdardyń 71% osy saraptamadan ótken. Árbir altynshy qazaqstandyq (64%) turaqty túrde jalpy tekserýden ótetinin jetkizgen.
Al uıqy sapasyn jaqsartý turǵysynda qazaqstandyqtar saýalnamaǵa qatysqan basqa elder arasynda aldyńǵy orynǵa shyqqan. Bul rette saýlnama kezinde adamdardyń 87 paıyzy ózderin uıqysyzdyq mazalamaıtynyn málimdegen.
«Qazaqstan medısına salasyndaǵy ınovasıalardy engizý baǵytynda da jaqsy kórsetkishterdi baıqatty. Máselen, Qazaqstanda dárigerdiń qabyldaýyna onlaın rejımde jazylý kórsetkishteri ortashadan joǵary deńgeıde, ıaǵnı 52 paıyzǵa jetken. Al Eýropada osy kórsetkish 45 paıyz shamasynda boldy», - dedi Armınas Masevıchýs.