Almaty qalasy ákiminiń orynbasary Álisher Ábdiqadyrov pen Shyǵys Eýropa aımaǵy boıynsha Mastercard bólimshesiniń prezıdenti Iasemın Bedır sıfrlyq tehnologıalar salasyndaǵy jobalardy iske asyrý maqsatynda Ózara túsinistik týraly memorandýmǵa qol qoıdy, dep habarlaıdy almaty-akshamy.kz
Taraptar yntymaqtastyq úshin birqatar baǵyttardy, sonyń ishinde qolma-qol aqshasyz tólem júıesinde ınovasıalyq sheshimderdi engizýdi aıqyndady. Mastercard korporasıasynyń Tourism Insights sıfrlyq platformasy, týrısiń minez-qulyq profılin jasaýǵa, turý oryndary men barý obektilerin tańdaý kezinde onyń qalaýyn baǵalaýǵa, dınamıkadaǵy áýejaıdyń keptelisin jáne t.b. baqylaýǵa múmkindik beredi, bul týrızm ındýstrıasyn damytý úshin sheshim qabyldaýǵa kómektesedi.
«Búgingi qadam Almatynyń Smart City baǵytynda damýyn jedeldetýge, turǵyndar úshin de, sheteldik qonaqtar úshin de qolaıly qalalyq orta qurýǵa, qalanyń týrısik áleýetin keńeıtýge yqpal etetinine senimdimin», – dedi Álisher Ábdiqadyrov.
Qol qoıylǵan memorandým aıasynda taraptar Almaty qalasyn Mastercard City Possible Network halyqaralyq jelisine qosý týraly ýaǵdalasty.
«Mastercard basshylyǵynyń Prezıdent Qasym-Jomart Toqaevpen Nú-Iorkte ótken keshegi kezdesýinde, biz Ortalyq Azıa men TMD-daǵy Mastercard bıznesiniń óńirlik ortalyǵy Almaty bolatynyn jarıaladyq. Sondaı-aq Qazaqstan Respýblıkasynyń Sıfrlyq damý, ınovasıalar jáne aeroǵarysh ónerkásibi mınıstrligimen áriptestik týraly bes jyldyq kelisimge qol qoıdyq, onda Qazaqstan Úkimetimen yntymaqtastyqtyń basym taqyryptarynyń biri retinde «aqyldy qalalar» kórsetilgen. Mastercard, birlesken bastamalardy iske asyrýda, Almaty ákimdigin tehnologıalarmen jáne jahandyq saraptamamen qoldaýǵa daıyn», - dedi Iasemın Bedır.
Mastercard – 60-tan astam elde 1600-den astam memlekettik jobalardy júrgizetin jahandyq tólem jáne tehnologıalyq kompanıa. Qazaqstanda kompanıa tólemderdi sıfrlandyrý esebinen qolma-qol aqshasyz ekonomıkany damytýǵa belsendi qatysyp, 20 jyldan astam jumys isteıdi.