Prezıdent elimizdi damytýdyń árbir qadamyn oılastyrdy
Almatyda «AMANAT» partıasy qalalyq fılıalynyń partıa aktıvi Prezıdent Qasym-Jomart Toqaevtyń «Ádiletti memleket. birtutas ult. berekeli qoǵam» atty halyqqa Joldaýyn talqylady, dep habarlaıdy Almaty-akshamy.kz.
Talqylaýǵa partıa belsendileri, qalalyq Saıası keńes músheleri, máslıhat depýtattary, aýdandyq fılıaldardyń atqarýshy hatshylary jáne «Jastar Rýhy» jastar qanatynyń ókilderi qatysty.
Partıanyń qalalyq fılıalynyń atqarýshy hatshysy Meıirjan Otynshıev Joldaýdyń ádiletti Qazaqstandy qurý jolyndaǵy taǵy bir mańyzdy qadam bolǵanyn atap ótti.
«Qazirgi qoǵamdaǵy syndardy eskere otyryp, Memleket basshysy áleýmettik saıasatty kúsheıtýde. Bilim berý men densaýlyq saqtaýdy damytýǵa, jastar men aýyl sharýashylyǵyn qoldaýǵa úlken qarajat bólinedi, barlyq áleýmettik tólemder ındeksteledi, zeınetaqylar qaıta qaralady, «Ulttyq qor – balalarǵa» baǵdarlamasy iske qosylady. Bul rette, «AMANAT» partıasy elimizdiń jetekshi saıası kúshi retinde Prezıdenttiń barlyq bastamalaryn tolyq qoldaıdy. Joldaýda usynylǵan barlyq reformalar – bul el damýyndaǵy qýatty serpiliske qol jetkizýge yqpal etetin naqty sharalar», - dedi M.Otynshıev.
Amanattyqtardyń pikirinshe, mundaı reformalar elimizdiń áleýmettik-ekonomıkalyq áleýetin nyǵaıtýǵa yqpal etedi.
«Biz keshegi Prezıdenttiń Joldaýyn úlken úmitpen kúttik. Eń mańyzdy aspekt áleýmettik blok boldy. Mysaly, eń tómengi jalaqyny kóbeıtý, bul mıllıondaǵan azamattardyń ál-aýqatyna oń áser etedi. Áıelderdiń zeınetkerlik jasy, 2023 jyldan bastap 1,5 jasqa deıingi bala kútimi boıynsha járdemaqy tólemderin uzartý jáne t.b. máseleler. Jalpy, Joldaýdy taldaı otyryp, Prezıdent elimizdi damytýdyń árbir qadamyn oılastyrǵanyn senimmen aıtýǵa bolady», - dep atap ótti Otbasy jáne halyqty áleýmettik qorǵaý máseleleri jónindegi óńirlik Qoǵamdyq keńestiń tóraıymy, Almaty qalasy máslıhatynyń depýtaty Rahat Shımasheva.
Talqylaý barysynda Qazaq ulttyq agrarlyq zertteý ýnıversıtetiniń rektory, «AMANAT» partıasy qalalyq fılıaly Saıası keńes Búrosynyń múshesi Tilektes Espolov óz oıymen bólisti.
«Bizdiń megapolıste 11 ulttyq ýnıversıtettiń 8-i ornalasqan. Sondyqtan stýdentterdi jataqhanamen qamtamasyz etý, onyń ishinde stýdentterdiń jekelegen áleýmettik osal sanattary úshin turý shyǵyndaryn sýbsıdıalaý máselesi – el tarıhyndaǵy buryn-sońdy bolmaǵan oqıǵa. Stýdentter bul jańalyqty úlken qýanyshpen qabyldady», - dep túıindedi T.Espolov.
Sondaı-aq, «AMANAT» depýtattyq fraksıasynyń músheleri Nurymbek Taý, Artýr Kotenóv, Ramazan Bekbol jáne partıa belsendisi Raıhan Bólekbaeva óz pikirlerin bildirdi.
Partaktıv qatysýshylary Joldaýdy, ásirese áleýmettik-ekonomıkalyq blok boıynsha qoldaýdy jáne jan-jaqty ilgeriletýdi qamtamasyz etý mańyzdy degen ortaq pikirge keldi. Partıa músheleriniń aldynda jaýapty mindet tur - qoǵam Memleket basshysy tapsyrmalardyń mánin jáne olardy oryndaý úshin birliktiń qajettiligin túsinýi úshin jumys isteý. Aıta ketý kerek, partıa músheleri Joldaýdyń negizgi máselelerin barlyq deńgeıde keńinen talqylaýǵa kiristi.