· Bıylǵy jyl elimizde «Jumysshy mamandyqtary jyly» dep jarıalandy. Bul sheshim elimizdiń ekonomıkasynyń, ónerkásibi men óndirisiniń negizi bolatyn mamandyqtardyń erekshe nazarda ekenin kórsetedi.
Búginde jumysshy mamandyqtary qoǵamda mańyzdy oryn alady, óıtkeni olar eldiń áleýmettik-ekonomıkalyq damýyna jáne halyqtyń ál-aýqatyn jaqsartýǵa tikeleı áser etedi. Jumysshylar kez kelgen qoǵamnyń tiregi bolyp tabylady. Olar óndiristiń júregi, al adamdardyń eńbek qyzmeti – el ekonomıkasynyń basty júıesi.
Elimizde jumysshy mamandyqtarynyń mańyzy artty. Jańa tehnologıalar men sıfrlyq ınovasıalardy engizý, avtomattandyrý men robotızasıalaý salasyndaǵy jetistikter bul mamandyqtardyń jańarýyna, túrlenýine yqpal etip otyr. Eńbek naryǵynda basqarý, uıymdastyrý, zertteý, keńes berý sıaqty qyzmetterden turatyn jumys baǵyttaryna jumys izdeýshilerdiń kóptigin kórip otyrmyz. Degenmen, qoǵamda jumysshy mamandyqtary da joǵary suranysqa ıe, olardyń tabysy da turaqty sanalady. Osy maqsatta jumysshy mamandyǵyna jastardy tartý, olardyń bilimin jetildirý, kásibı daǵdylaryn arttyrý – basty mindet. Jastardyń qyzyǵýshylyǵyn arttyrý úshin oqytý júıesin qaıta qaraý, jastarǵa kásibı baǵdar berý, arnaıy kýrstar men trenıńter ótkizý qajet. Óndiriste júrip, jetistikke jetken tulǵalardy jıi nasıhattap, olarmen jastardyń tikeleı júzdesýin, aqyl-keńes, tájirıbe almasýyn uıymdastyrǵan jón.
Qazaqstanda jumysshy mamandyqtaryn damytý úshin arnaıy baǵdarlamalar da qabyldanyp jatyr. Mysaly, «Serpin» baǵdarlamasy aıasynda aýyl jastaryn tehnıkalyq jáne kásibı bilimmen qamtý jolǵa qoıyldy. Sonymen qatar, jumysshy mamandyqtaryn oqytatyn kolejder men oqý oryndarynyń sany kóbeıip, olarda zamanaýı jabdyqtar men tájirıbeli ustazdar jumys isteı bastady.
El ekonomıkasynyń qozǵaýshy kúshi
Qazirgi tańda jumysshy mamandyqtarynyń tabıǵaty ózgerdi desek, artyq emes. Sebebi, joǵary tehnologıalyq óndirister men ınovasıalyq sheshimder jumysshy mamandyqtarynyń jumys isteý úrdisin ózgertti. Máselen, dánekerleýshi mamandyǵy robottandyrylǵan qondyrǵylarmen jumys isteýge, tokar mamandyǵy 3D prınterlermen jáne sıfrlyq basqarý júıelerimen jumys isteýge kóshti. Sondyqtan bul mamandyqtar joǵary biliktilikti jáne jańa daǵdylardy qajet etedi. Árıne, eń aldymen jumysshy mamandyqtary – el ekonomıkasynyń qozǵaýshy kúshi. Ásirese, qazirgi ekonomıkalyq daǵdarys kezeńinde, eldiń ekonomıkalyq qaýipsizdigin qamtamasyz etýde óte mańyzdy ról atqarady.
Óndiris, qurylys, aýyl sharýashylyǵy salalaryndaǵy jumysshylar el ıgiligi úshin eleýli eńbek etip jatyr. Qurylysshy, metalýrg, energetık, agronom, mehanızator sekildi mamandardyń qyzmeti qoǵamnyń barlyq salasyna áser etedi. Turmys qajettiligin qamtamasyz etetin salalar – aspazshy, tiginshi, shashtaraz mamandyqtary zaman talabyna saı sát saıyn jańara túsýde. Osy salalardaǵy eńbekkerlerdiń biliktiligi men kásibı daǵdylaryn únemi arttyryp otyrý – eń aldymen el ekonomıkasynyń damýyna jáne qýattanýyna tikeleı yqpal etedi.
Jumysshy mamandyqtary jylynyń jarıalanýy – elimizdiń bolashaǵy úshin mańyzdy qadam. Maqsat – jumysshy mamandyqtarynyń mártebesin arttyrý, jumysshy mamandyqtarynyń ımıjin kóterý jáne jastardy osy mamandyqtarǵa tartý, qoǵamda jumysshy mamandyqtarynyń mańyzdylyǵyn túsindirý, sonymen qatar kásiptik bilim berý júıesin jetildirý. Tek osyndaı keshendi sharalar arqyly ǵana biz qoǵamdy turaqty damytyp, óndiris salasyn alǵa jyljytamyz.