Búgin Qazaq ulttyq qyzdar pedagogıkalyq ýnıversıtettiń rektory Gúlmıra Qanaı ardager ustazdarmen kezdesti.
Almatyda Ýnıversıtettiń 80 jyldyq mereıtoıyna oraı joǵary oqý orynynyń zıaly túlekteri – ustazdarmen kezdesti, dep habarlaıdy aqshamnews.kz.
Shara Qazaq ulttyq qyzdar pedagogıkalyq ýnıversıtetiniń damýyna zor úles qosqan ustazdar men ǵalymdardyń ómir joly men ǵylymı-pedagogıkalyq qyzmetterin nasıhattaý maqsatynda uıymdastyryldy. Sonymen qatar ulttyq ǵylym men bilimniń ótkeni men búginin, bolashaǵyn talqylaý, jas ǵalymdar men zertteýshilerdiń ǵylymı áleýetin damytý máseleleri kezdesýge arqaý boldy.
«El bolashaǵy – ustazdardyń qolynda. Ulaǵatty ustazdardyń arqasynda elimizdiń pedagogıkalyq jáne ózge de salalary joǵary bilikti mamandarmen tolyqtyrylyp jatyr. Tárbıeli jastarymyz adal qyzmet etip, kásibı biliktilikterin arttyrýda. Bul eń aldymen, siz men bizdiń toqtaýsyz izdenisimizdiń, kásibimizge degen mahabbatymyz ben adal qyzmetimizdiń, elimizge, jas urpaqqa degen súıispenshiligimizdiń belgisi dep bilemin», – dedi ýnıversıtet rektory Gúlmıra Qanaı.
Jıynda Memleket basshysy Qasym-Jomart Kemeluly Toqaevtyń Qazaqstan halqyna Joldaýynda aıtylǵan ustazdardyń biliktiligin arttyrý máselesi talqylandy. Ýnıversıtettiń jetken jetistikteri men alǵa qoıǵan josparlary da aıtyldy. Sonymen qatar bilim ordamyzdyń aǵa oqytýshylary men bilim jáne ǵylym salasynda qyzmet etip júrgen ýnıversıtet túlekteri óz baıandamalaryn usyndy.
Fızıka-matematıka ǵylymdarynyń doktory, profesor Ershına Aınagúl Qapasovna ýnıversıtet basshylyǵyna alǵysyn aıtty.
«Men osy ýnıversıtettiń 1971 jylǵy túlegimin. Búginde fızıka-matematıka ǵylymdarynyń doktory, profesormyn. Bilim salasynda qyzmet etkenime 37 jyl boldy. Ár jetken jetistigim qadirli ustazdarymnyń qajyrly eńbegi dep bilemin. Sol kisilerdiń jolymen biz de shákirt tárbıelep kelemiz. Bizdiń basty maqsatymyz – shákirtterge sapaly bilim berý. Eńbegimizdi eskerip, elep jatqan Ýnıversıtet basshylyǵyna aıtar alǵysym sheksiz», – dedi ustaz.
Kezdesý sońynda zıaly ustazdardy marapattaý rásimi ótti