Barlyq qazaqstandyqtardy el Táýelsizdiginiń 30 jyldyq mereıli toıymen quttyqtaımyn!
Otyz jyl – bir urpaq belesi. Osy otyz jylda qalyptasqan urpaqtyń aldy Táýelsizdik qurdastary bolsa, mine, olar da orda buzar jasqa kelip, qoǵamnyń barlyq salalarynda jemisti eńbek atqaryp júr.
Taıaýda Tuńǵysh Prezıdentimiz, Elbasy Nursultan Ábishuly Nazarbaevtyń «Táýelsizdik taǵylymy» atty maqalasy jaryq kórdi. Elbasy táýelsizdik jolynda qansha ata-babalarymyzdyń qurban bolǵanyn aıta kele, Qazaqstannyń óz táýelsizdigin jarıalaý tusynda bolǵan tarıhı sátterimen bólisip, ózi basqarǵan kezeńderdegi qıynshylyqtar men qýanyshtardy eske alyp, keıingi jastarǵa taǵylymdy oılaryn jetkizipti. Áýeli Patshalyq Reseı ımperıasynyń otarlaý saıasaty, odan Keńes úkimetiniń totalıtarlyq rejıminiń jemisi bolǵan asharshylyq, saıası qýǵyn-súrgin, repressıa saldarynan talaı asyldarymyzdan, rýhanı qundylyqtarymyzdan, tarıhı jádigerlerimizden, salt-dástúrlerimizden aırylyp, ulttyq bolmysymyzdy joǵaltyp ala jazdaǵanymyzdy tilge tıek etip, egemendiktiń arqasynda qaıta jańǵyryp, damýdyń dańǵyl jolyna túskenimizge táýbe deıdi.
Jas memleketimizdiń irgeli elge aınalýyna Tuńǵysh Prezıdentimiz, Elbasy Nursultan Ábishuly Nazarbaevtyń orasan zor eńbek sińirgeni belgili. Onyń kóregendiligi men el basqarýdaǵy tájirıbesiniń, álemdik saıasattaǵy durys ustanymdarynyń arqasynda táýelsiz elimiz qaryshtap damyp, qazirgi tańda álem tanyǵan Qazaqstanǵa aınalyp otyr. Árıne, mundaı jetistikterge jetýde ony qoldaýshy halqy men ártúrli sala mamandarynyń úlesi de zor. Ásirese, Elbasynyń eń mańyzdy sheshimderiniń biri – álemdegi tórtinshi ıadrolyq qarý arsenalyna ıe bola tura, odan bas tartý, elimizdi jahandaǵy beıbitshilik jarshysy degen atqa ıe bolýyna yqpal etip, rasynda da adamzat úshin eń joıqyn zardap ákelýshi jappaı qyratyn qarýdyń damýyna tosqaýyl qoıatyn úlken qadam bolǵany barshaǵa aıan. Tuńǵysh Prezıdentimizdiń bastamasymen elimizdegi túrli salalarda kóptegen ıgi ister jolǵa qoıylǵanyn da kópshilik jaqsy biledi.
«El aǵasyz bolmaıdy, ton jaǵasyz bolmaıdy» deıdi babalarymyz. Qaı zamanda da halqymyz úlkendi syılap, olardyń danalyqqa toly ósıetterin oryndap, bolashaqqa baǵyt alyp otyrǵan. Áýelden meken etken ata qonysymyz, osynaý ulan-ǵaıyr jerdi jankeshtilikpen qorǵap, bizderge amanattap, sondaı-aq adamgershilik pen meıirimdi, dostyq men adaldyqty, uıat men namysty, yntymaq pen birlikti ar etken ozyq dástúr qaldyrǵan ata-babalarymyzdyń tektiligi men erliginen asqan úlgi joq bizderge. Táýelsizdik – bizge sol babalarymyzdyń jasaǵan erlikteri men etken duǵalarynyń bedeline berilgen Jaratqannyń syıy. Endigi jerde ony saqtap, baıandy etý – bizge júktelgen mindet.
Arman Júdebaev,
Qurmanǵazy atyndaǵy
Qazaq ulttyq konservatorıasynyń rektory,
QR Eńbek sińirgen qaıratkeri