Bul baǵdarlama 4 jylǵa arnalǵan.
Qazaqstandyq eksporttaýshylar Ortalyq Azıa elderindegi áriptesterimen birge Eýropalyq Odaq esebinen transshekaralyq saýda boıynsha tegin bilim alady, dep habarlaıdy Almaty-akshamy.kz QazAqparatqa silteme jasap.
Astanada «QazTrade» aksıonerlik qoǵamynyń uıymdastyrýymen atalǵan baǵdarlamanyń tanystyrylym ótti.
«QazTrade» akısonerlik qoǵamy bas dırektorynyń orynbasary Nurlan Qulbatyrovtyń aıtýyna qaraǵanda, atalǵan baǵdarlama «Ready4Trade Central Asia» jobasynyń aıasynda iske asyrylmaq.
«Jalpy, bul baǵdarlama 4 jylǵa arnalǵan. 2019 jyldan beri birneshe komponenti iske asyryldy. Mysaly, bıyl jazda saýda portaly iske qosylǵan edi. Sondaı úlken baǵyttyń biri – qazaqstandyq eksporttaýshylardy oqytý. 1,5 jyl boıy kásibı nusqaýshylar jumys istep, tálimgerlerdi daıarlady. Endi sol tálimgerler eksporttaýshylarǵa sabaq beredi», - dedi ol.
Al Eýropalyq Odaq ókildigi Ortalyq Azıanyń óńirlik baǵdarlamalary Qazaqstandaǵy yntymaqtastyq bólimi baǵdarlamalarynyń menedjeri Iýrıı Skaskeevıchtiń aıtýynsha, oqytý baǵdarlamasy osydan 4 jyl buryn bólingen 15 mln eýronyń esebinen iske asady.
«Meniń portfolıomdaǵy eń úlken baǵdarlamanyń biri – osy 4 jyldyq baǵdarlama. Ol búkil Ortalyq Azıa elderine baǵyttalǵan. Búdjeti aıtarlyqtaı salmaqty – 15 mln evro. Osy qarajat aıasynda qarjylandyrylyp jatqan baǵyttyń biri eksporttaýshylardy oqytýǵa arnalyp otyr», - dedi Iýrıı Skaskeevıch.
Joba avtorlarynyń málimetine súıensek, qazaqstandyq eksporttaýshylar oqý baǵdarlamasy arqyly halyqaralyq saýda erejeleri, eksporttyq rásimder, tranzıttik baǵyttar, sapa jáne sáıkestik standarttary, Eýropalyq Odaq naryǵyna arnalǵan naqty talaptar týraly bilim alyp, ol alǵan bilimderin is júzinde qoldanyp mashyqtanady.
Oqytý onlaın rejımde de, offflaın rejımde de usynylady. Trenıńti Dúnıejúzilik saýda uıymy men Birikken Ulttar uıymyna qarasty Halyqaralyq saýda ortalyǵy ázirlegen.
Bul baǵdarlama Qazaqstannyń búkil aımaqtaryn qamtıdy dep josparlanǵan. Sol úshin QazTrade komıpanıasynyń janynan elektrondyq oqytý platformasy ashylyp otyr. Sol platformanyń (https://www.qaztradeacademy.kz/), kómegimen áleýetti jáne jumys istep turǵan eksporttaýshylar búkil kýrstardy onlaın rejıminde tegin ótip, sertıfıkattar alady.