Vaksınalaý pasportyn satyp almaı turyp, ózińiz ben jaqyndaryńyzdyń densaýlyǵyna qaýip tóndiretinińizdi oılańyz!
Búgin QR DSM sanıtarlyq-epıdemıologıalyq baqylaý komıtetiniń tóraǵasy Aıjan Esmaǵambetova osylaı dedi, dep habarlaıdy Almaty-akshamy.kz
«Pasporttyń ras-ótirigin tekserý múmkin emes, adamnyń ózi vaksına almaǵanyn, jalǵan qujat jasatqanyn moıyndasa ǵana ashylady. Bul rette, qurmetti qazaqstandyqtar, sizder vaksınalaý pasportyn satyp alǵanda kem degende reanımasıaǵa bılet satyp alǵanyńyzdy eskerińiz. Sondyqtan, memleket tegin qorǵanýǵa múmkindik berip otyrǵan kezde siz óz qarajatyńyzdy jalǵan pasportqa jumsaǵanda, joǵaryda aıtqanymdaı, aýyryp qalýǵa, tipti qaıtys bolýǵa joldama alǵanmen teń bolasyz. Sondyqtan, ózderińiz oılanyp kórińizder», - dedi Aıjan Esmaǵambetova.
Spıkerdiń aıtýynsha, qoldan jasalǵan pasport úshin jaýapkershilik qarastyrylǵan.
«Pasportty qoldan jasaý úshin de, qoldan jasaý prosedýrasy úshin de, ony satyp alý úshin de jaýapkershilik qarastyrylǵan. Densaýlyq saqtaý mınıstrliginiń ózi vedomstvoaralyq komısıada jalǵan vaksınalaý pasporttary máselesin kóterdi. İshki ister mınıstrligi qoldan jasalǵan pasporttar boıynsha birqatar qylmystyq is qozǵady. Ásirese, vaksınalaýdyń tıimdiligine kúmán keltirip jatqanda buǵan jol berýge bolmaıdy. Vaksınalaý pasportyn satyp almaı turyp, ózińizdiń jáne jaqyndaryńyzdyń densaýlyǵyna qaýip tóndiretinińizdi oılańyz, sebebi vırýs tasymaldaýshysy bolýyńyz ábden múmkin», - dedi DSM ókili.