«Amanat» partıasynyń Taraz qalasyndaǵy oblystyq fılıalynyń tóraǵasy Daýyl Beısenqulov bastaǵan AES qoldaý shtabynyń músheleri birqatar kezdesýler ótkizdi.
Shtab quramynda Ersin Sarıev, Serik Jetibaev, Dáýren Ahmetjaev, Andreı Savchenko, Anar Dosymabaeva jáne Janat Bastaýbaeva boldy. Olar aldymen oblystyq narkologıalyq dıspanserde kezdesý ótkizip, referendýmnyń mańyzy men atom energetıkasynyń el úshin qajettiligin talqylady.
«Ǵylymı-tehnıkalyq jáne ınjenerlik salalardy damytý asa mańyzdy. AES elimizdiń ǵylymı áleýetin kóterip, mamandar daıarlaýǵa múmkindik beredi. Atom elektr stansasy – bul tek energıa kózi emes, sonymen qatar, ǵylymı-zertteý múmkindikterin arttyratyn joba», – dedi Daýyl Beısenqulov.
Taraz qalasynyń turǵyndarymen kezdesýde shtab músheleri AES salýdyń el ekonomıkasy men ekologıalyq qaýipsizdikke tıgizer paıdasyn atap ótti. Olardyń aıtýynsha, AES energıaǵa táýeldilikti tómendetip, ekonomıkaǵa serpin bermek.
«Ekonomıkamyzdyń turaqty damýy úshin generasıa kólemin eki esege arttyrý qajet. Ol úshin gaz qondyrǵylaryn ornatý, JEO-lardy jańǵyrtý jáne AES salý qajet», – dedi Dáýren Ahmetjaev.
Kúnniń ekinshi jartysynda shtab músheleri «Kazfosfat» kompanıasy jáne Taraz qalalyq emhanasynyń qyzmetkerlerimen kezdesti.
Jıynda AES-tiń ekologıalyq turǵydan qaýipsiz ekeni túsindirildi. Shtab músheleri jobanyń qorshaǵan ortaǵa zıany joq ekenin atap ótip, turǵyndardyń suraqtaryna jaýap berdi.
Kezdesý sońynda eldiń ekonomıkalyq jáne áleýmettik damýynda mańyzdy sheshim qabyldaýǵa atsalysý qajettigi aıtyldy.