"Ǵarysh Sapary Ulttyq kompanıasy" AQ ǵaryshtyq monıtorıń derekterine sáıkes aǵymdaǵy jyldyń 7 qarashadaǵy jaǵdaı boıynsha 5552 ruqsat etilmegen qoqys úıindileri anyqtaldy, olardyń 3831-i nemese 70%-y joıyldy.
Ekologıa, polısıa departamentteri men jergilikti atqarýshy organdardyń qatysýymen qaldyqtardy ruqsatsyz ornalastyrýdyń jolyn kesý jónindegi birlesken is-sharalar jospary bekitildi. Qaldyqtardy ornalastyrýdyń ruqsat etilmegen oryndaryn túgendeý jáne anyqtaý boıynsha birlesken reıdtik is-sharalar apta saıyn júzege asyrylady, dep habarlaıdy Almaty-akshamy.kz.
Ekologıa jáne tabıǵı resýrstar mınıstrliniń málimetinshe, barlyǵy 4632 ret tekserý júrgizildi.
Sonymen qatar, áleýmettik jelilerge únemi monıtorıń júrgizilip, qoqysty shyǵarý men joıýǵa beınebaqylaý kúsheıtildi.
Búgingi tańda qoqystardy joıý boıynsha eń joǵary kórsetkishter Qyzylorda oblysynda, Abaı oblysynda jáne Shymkent, Almaty qalalarynda baıqalady, bul rette Mańǵystaý oblysynda, Ulytaý oblysynda jáne Astana qalasynda tómen kórsetkishter baıqalady.
Qaldyqtardy jınaqtaý, jınaý, tasymaldaý, esepke alý jáne zalalsyzdandyrý boıynsha ekologıalyq talaptardy buzǵany úshin jalpy somasy 16,4 mln teńgege 149 laýazymdy tulǵa ákimshilik jaýapkershilikke tartyldy.
Jalpy alǵanda, sońǵy úsh jylda anyqtalǵan ruqsat etilmegen polıgondar sanynyń tómendeý úrdisi baıqaldy. Máselen, 2020 jyly – 8884 joıylǵan 5823 úıindi, 2021 jyly-7328, joıylǵan 6740 úıindi, 2022 jyly – 5683 joıylǵan 4331 úıindi joıyldy.