Premer-mınıstr aýaǵa taraıtyn zıandy qaldyqtardy azaıtý jóninde sharalar qabyldaý jáne karbondy polıgondar qalyptastyrý úshin jaǵdaı jasaýdy tapsyrdy, dep habarlaıdy aqshamnews.kz
Úkimet otyrysy barysynda Premer-mınıstr Oljas Bektenov «Taza Qazaqstan» respýblıkalyq aksıasy aıasynda azamattardyń ekologıalyq minez-qulqyn qalyptastyrý úshin jaǵdaı jasaýdyń mańyzdylyǵyn atap ótti.
«Kez kelgen azamat elimizdiń kıeli tabıǵatyn aıalap, turǵylyqty jerin abattandyrýǵa óz úlesin qosa alady.
Ol úshin ekologıalyq mádenıet kúndelikti ómirimizdiń ajyramas bóligine aınalýǵa tıis. Barlyq memlekettik organdar, bıznes pen búkil qoǵam bolyp osy jumystarǵa belsendi atsalysýymyz qajet», — dedi Oljas Bektenov.
Kómirtegi beıtaraptyǵyna qol jetkizý týraly Parıj kelisimindegi mindettemelerge sáıkes, aýaǵa taraıtyn zıandy qaldyqtardy azaıtý úshin tıimdi sharalar qabyldaý qajettigi atap ótildi. Osyǵan baılanysty Ekologıa jáne tabıǵı resýrstar mınıstrligine ákimdiktermen birlesip, qorshaǵan ortaǵa emısıalardy baqylaýdyń avtomattandyrylǵan júıelerin engizýdi jedel aıaqtaý tapsyryldy.
Premer-mınıstr qorshaǵan ortaǵa, ásirese kásiporyndar aınalasynda aýaǵa taralǵan zıandy gazdardy azaıtatyn karbondy polıgondar qurý arqyly ekojúıe qalyptastyrýdyń mańyzdylyǵyna nazar aýdardy. Mundaı jobalardy iske asyrý úshin Ekologıa jáne tabıǵı resýrstar mınıstrligine zańnamalyq túzetýler ázirleý jónindegi tapsyrma berildi. Sonymen qatar Prezıdenttiń eldi mekenderde aǵash otyrǵyzý týraly tapsyrmasyn oryndaýdyń mańyzdy ekeni atap ótildi.