Perzenthanadaǵy júkti áıelder de oblys ortalyǵyna jetkizildi
Pavlodar oblysyna qarasty Ekibastuz qalasyndaǵy jylý-elektr ortalyǵy men jylý jelilerindegi aqaýdyń saldarynan turǵyn úıler men áleýmettik nysandar jylýdan ajyratyldy, dep habarlaıdy Almaty-akshamy.kz inbusiness.kz-ke silteme jasap.
Kesheden beri oblys ákiminiń mindetin atqarýshy Ábilqaıyr Sqaqovtyń tóraǵalyǵymen qurylǵan jedel shtab túıtkildi sheshýdiń amaldaryn qarastyrýda. Mundaǵy qıyn jaǵdaıǵa tap bolǵan balalar ortalyǵynyń, "Jas órken" jasóspirimder úıiniń tárbıelenýshileri ýaqytsha Pavlodar qalasyna aýystyryldy. Perzenthanadaǵy júkti áıelder de oblys ortalyǵyna jetkizildi.
Al tún ortasynda Ekibastuz qalasynda tótenshe jaǵdaı rejımi jarıalandy.
QR "Azamattyq qorǵaý týraly" Zańynyń 48-babyna sáıkes Ekibastuz qalasynyń aýmaǵynda jylý jelilerindegi apatqa baılanysty qala ákimi tehnogendik sıpattaǵy jergilikti tótenshe jaǵdaıdyń jarıalanǵanyn habarlady.
"Saǵat 01:30-daǵy jaǵdaı boıynsha 17 kópqabatty turǵyn úı, bes áleýmettik jáne 21 zańdy tulǵa nysany áli de jylýsyz qalyp otyr. Apattyq rejım tótenshe jaǵdaı aımaǵyndaǵy jóndeý-qalpyna keltirý jumystary tolyq aıaqtalǵanǵa deıin kúshinde bolady"-dep habarlady jergilikti ákimdik.
Aıta keteıik, bastapqyda qaladaǵy 130 turǵyn úı jylýsyz qalǵan edi.