Bıyl mamyr aıynda «Maıak» jáne «Álmerek» shaǵyn aýdandarynda 54,1 shaqyrym sýmen qamtý jáne sý burý jelileriniń qurylysy bastaldy.
Injenerlik jelilerdi tóseý jumystary osy jyldyń sońyna deıin aıaqtalyp, 1500-den astam abonent aýyz sýmen qamtylatyn bolady, dep habarlaıdy Almaty-akshamy.kz.
Jumystar aıaqtalǵannan keıin, 2024 jyly asfált tóseý jumystaryna kirispek. Bul týraly búgin Almaty qalasynyń ákimi Erbolat Dosaevtyń Túrksib aýdany turǵyndarymen kezdesýinde málim boldy.
3 ýchaske boıynsha – «Qaırat» shaǵyn aýdanynda saraptama osy jyldyń shilde aıynyń sońynda aıaqtalmaq. Al Rysqulov - Jansúgirov – Sholohov – Seıfýllın kósheleriniń aýmaǵy boıynsha saraptamalyq jumystar 2024 jyldyń naýryz aıynda aıaqtalady. Toqaı – Norılskıı – Poddýbnyı – Dıkson kósheleriniń bóliginde saraptama 2023 jyldyń jeltoqsan aıynyń sońynda aıaqtalady.
2021 jyly «Nurshashqan» shaǵyn aýdanynda jalpy uzyndyǵy 47,4 shaqyrym sýmen qamtý jáne kanalızasıa jelileriniń qurylysy aıaqtaldy. Bul jumysty merdiger «Kompanıa NýraıStroı» jaýapkershiligi shekteýli seriktestigi júrgizgen. Alaıda, obekt paıdalanýǵa berilgen sátten bastap bul jelilerde
30-ǵa jýyq avarıa oryn aldy. Sonyń saldarynan aýyz sý berý uzaq ýaqytqa toqtatylýda. Sondyqtan turǵyn úı massıviniń turǵyndary tarapynan shaǵymdar túsýde. Osyǵan baılanysty, Energetıka jáne sýmen jabdyqtaý basqarmasynyń talap-aryzy boıynsha merdigerge qatysty isti sotta qaraý bastaldy.
Búgingi tańda Túrksib aýdanynyń ákimdigi tótenshe jaǵdaı aıasynda jelilerdiń jumys qabilettiligin qalpyna keltirý máselesin pysyqtaýda.