25 shildede Qazaqstan boıynsha 730 eldi mekenniń ákimi tikeleı saılaý arqyly anyqtalady.
Aýdandyq mańyzy bar qalalar men aýyldardyń ákimderin saılaýǵa 2297 úmitker tirkeldi. Bul týraly Qazaqstan Respýblıkasy Prezıdentiniń kómekshisi Erlan Qarın jazdy, dep habarlaıdy Almaty-akshamy.kz.
«14 shildede aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimdigine kandıdattardy tirkeý aıaqtaldy. Respýblıka boıynsha saılaýǵa qatysý úshin jalpy 2582 adam óz kandıdatýrasyn usyndy, onyń 2297-si nemese 88,9% qajetti tirkeýden ótti. Saıası partıa kandıdattary – 878 adam (38,2%)», - dep jazdy Erlan Qarın Telegram jelisindegi paraqshasynda.
Prezıdent kómekshisi elimizdiń barlyq 6 saıası partıasy aýyl ákimdigine óz kandıdattaryn usynǵanyn atap ótti.
Sondaı-aq, úmitkerlerdiń kópshiligi, tirkelgenderdiń 1419-y nemese 61,8%-y – ózin-ózi usynǵandar.
«Iaǵnı, jańa normalar belsendi azamattar úshin óz áleýetin iske asyrýǵa qosymsha múmkindik berdi. Munyń bári Prezıdenttik saıası reformalardyń qoǵamda úlken qyzyǵýshylyq týdyrǵanyn kórsetedi», - deıdi Erlan Qarın.
