AQSH pen Qytaıdyń jetekshileri Ýkraınada ıadrolyq qarýdy qoldanýǵa qarsy boldy
AQSH prezıdenti Djo Baıden men Qytaı tóraǵasy Sı Szınpın Indonezıadaǵy Balı aralynda ótken kezdesýde basqa máselelermen qatar Reseıdiń Ýkraınaǵa qarsy soǵysyn talqylady jáne osy qaqtyǵysta ıadrolyq qarýdy qoldanýǵa qarsy boldy, dep habarlaıdy Almaty-akshamy.kz Svoboda.org silteme jasap.
Aq úı taratqan aqparat boıynsha, Reseıdiń Ýkraınaǵa basyp kirýi taqyrybyn AQSH prezıdenti Baıden kótergen.
«Prezıdent Baıden men Sı Szınpın ıadrolyq soǵys eshqashan bastalmaýy kerek jáne ony jeńýge bolmaıtyny týraly kelisimderin qýattady jáne Ýkraınada ıadrolyq qarýdy qoldaný nemese qoldaný qaýpine qarsy ekenin atap ótti», - delingen habarlamada.
Ýkraınada ıadrolyq qarý joq, sol sebepten eki el jetekshileri óz málimdemelerin eń aldymen Reseıge arnady.
Kezdesý barysynda Baıden Qytaı bıliginiń Shyńjań, Tıbet jáne Gonkongtaǵy adam quqyqtaryn saqtaý máselesin, sondaı-aq Amerıka Qurama Shtattarynyń Taıvan máselesi boıynsha kez kelgen taraptyń statýs-kvony buzýyna qarsy ekenin atap ótken.
Sı Szınpın kezdesý aldynda eki el ekijaqty qarym-qatynastardy damytýda «durys baǵytty» tabýy qajettigin aıtqan, sebebi muny kúlli álem kútip otyr.
Baıden kelissózderden keıin ótken baspasóz máslıhaty barysynda Sımen ótken kelissóz ashyq bolǵanyn aıtty. Ol taraptar keń aýqymdy taqyryptardy talqylaýdy jalǵastyrýǵa kelisti dep atap ótti. Sondaı-aq, Baıdenniń aıtýynsha, ol Qytaıdyń Taıvanǵa jaqyn arada basyp kirýge daıyndalyp jatqanyn kórsetetin eshqandaı belgilerdi kórmegenin jáne álem jańa qyrǵı-qabaq soǵysty boldyrmaıtynyn atap ótti.
Bul Baıden bılikke kelgennen beri eki kóshbasshynyń birinshi betpe-bet kezdesýi boldy. Ol Jıyrmalyq (G20) tobynyń jyl saıynǵy samıti aldynda ótti. Seısenbi kúni Indonezıada álemniń eń iri 20 ekonomıkasy basshylarynyń kezdesýi resmı túrde bastalady.