Endi sot áreketke qabiletsiz dep tanyǵan 18 jastan asqan adamdardyń qamqorshylary eGov.kz portalynda onlaın ótinish bere alady, - dep habarlaıdy aqshamnews.kz. Ulttyq aqparattyq tehnologıalar ortalyǵyna silteme jasap.
"Memlekettik qyzmetter salasynda "kedergisiz orta" qurý azamattardyń ártúrli sanattary úshin, onyń ishinde múmkindikteri shekteýli adamdar úshin teń múmkindikti qamtamasyz etedi. Buryn sot áreketke qabiletsiz dep tanyǵan 18 jastan asqan adamdardyń qamqorshylary qaǵaz túrinde qujattar jınap, arnaıy ótinimderdi rásimdeý úshin kezekte turatyn. Jańartylǵan qyzmet ýaqytty edáýir únemdep, qajet qujattardy onlaın rejımde berýge múmkindik beredi", - delingen habarlamada.
Endi qamqorshylarǵa memleket kórsetetin qyzmetterdiń kelesi túrlerin alýǵa onlaın ótinimderdi rásimdeýge bolady:
- Múgedekterdi protezdik-ortopedıalyq kómekpen qamtamasyz etý;
- Júrip-turýy qıyn birinshi toptaǵy múgedekter úshin jeke kómekshiniń kórsetiletin qyzmetterin paıdalaný;
- Múgedekterdi tehnıkalyq kómekshi (kompensatorlyq) quraldarmen qamtamasyz etý;
- Múgedekterdi arnaıy júrip-turý quraldarymen qamtamasyz etý;
- Múgedekter men múgedek balalardy sanatorıı-kýrorttyq emdeýmen qamtamasyz etý;
- Estý qabileti nashar múgedekterge ymdaý tili mamanynyń qyzmetin paıdalaný (jylyna 60 saǵat);
- Úıde kútim jasaý jaǵdaıynda arnaýly áleýmettik qyzmetter alý;
- Medısınalyq-áleýmettik mekemelerde (uıymdarda) arnaýly áleýmettik kórsetiletin qyzmetter alý.
Kórsetiletin qyzmetterdi alý úshin ne isteý kerek?
- eGov.kz portalynda avtorızasıadan ótý jáne "Áleýmettik qamsyzdandyrý" bólimine ótý qajet;
- Budan ári "Múgedektigi bar adamdardy qoldaý" bóliminde usynylǵan tizbeden kórsetiletin qyzmetti tańdaý kerek;
- ESQ kómegimen qyzmetke qol qoıý kerek.
Kórsetken ýaqyt ishinde kelip túsetin ótinimdi óńdeý týraly habarlammen jeke kabınette tanysýǵa bolady ("Qyzmetterdi alý tarıhy" bóliminde).