Biz nege birden jaman jaǵymyzdy hám kemshilikterimizdi aıtýǵa qumarmyz osy... Qıt etse boldy, áleýmettik jelige abaısyzda sózden súringen sheneýnikti, qapelimde aıaǵyn shalys basqan pende men oılanbastan qatelik jasaǵan jannyń áreketin áshkerelep, eldiń talqysyna salyp jatamyz. Nege? Adam bir bálege ádeıi urynaıyn demeıdi. Desek te, eshkim minsiz emes. Jaǵymdy-jaǵymsyz qasıet bárimizde bar. Biraq... sonyń barlyǵyn jón-josyqsyz jalpaq jurtqa jarıa etýdiń qanshalyqty qajeti bar?..
Iá, áleýmettik jeli búginde myqty aqparat qura lyna aına ldy. Jeldeı júıtkigen habardy aınalasy 5–10 mınýttyń ishinde-aq alý qazir túk emes. Sonyń áserinen biz qaraýǵa turmaıtyn, maǵynasy taıaz, dánegi joq arzan aqparattar legin esh kedergisiz qabyldaı beretin boldyq. Alaıda, bul sózim áleýmettik jelini paıdasyz degendi bildirmeıdi. Ǵalamtordyń jaqsy jaqtary barshylyq. Kez kelgen aqparatty – aýdıo jáne vıdeojazbanyń qoljetimdiligi, aqparat izdeý men almasý, qaıda júrseń de beıneqońyraý arqyly sóılesý sekildi artyqshylyqtary jeterlik.
Áleýjelide kóńilge túıip, kókeıge toqıtyn súbeli dúnıeler óte kóp. Máselen, búginde basqa jelige qosylmasa da, vat s apty paıda lanbaıtyn jan joq. Smartfondarǵa arnalǵan messendjer úlkenniń de, kishiniń de telefonynda bar. WhatsApp arqyly tárbıelik máni bar qundy dúnıelerdi kóbirek oqıtynymyz ras. Al Facebook jelisin ulttyq múdde turǵysynan jazylatyn qundy dúnıelerdi bir demmen oqýdyń múmkindigi mol. Onda salmaqty oı, saraly sóz aıtatyn tanymal tulǵalar men ot aýyzdy, oraq tildi aqyndardyń, sóz qadirin biletin, tili shuraıly jýrnalıs qaýymynyń jazbalarynan lázzat alasyń.
Sondyqtan Feısbýk oı-pikir almasýdyń taptyrmas quraly ekeni ekibastan. Mine, bul áleýmettik jeliniń bizge rýhanı dem beretin paıdaly jaqtary... Birin aıtyp, birine ketti demeńiz, endi men bastapqy aıtar oıyma oralaıyn...
Qazir qoly qalt etip bosaı qalǵan adam áleýjelini bir sholyp shyǵady. Bul kórinisti barlyq jerden baıqaýǵa bolady. Qoǵamdyq kólik, asqana, aıaldama, t.s.s. Jalpy, óz basym, ózgeniń oǵash qylyǵyn, bireýdiń artyq áńgimesin tyńdap, kórip otyrýǵa onsha áýes emespin. Senseńiz, áleýjelidegi qaptaǵan «aqylgóılerdiń» birde-biriniń vebınaryna qatysyp kórmeppin, qulqym joq. Ondaıǵa altyn ýaqytymdy arnaǵym da kelmeıdi. Biraq anda-sanda vatsappen beınejazbalar kelgende kórýge týra keldi. Shynymdy aıt aıyn, birinen-biri ótken soraqy beınejazbalardy qarap otyryp, ózgeniń emes, óz ultyńnyń mazaqqa aınalǵan qylyqtaryna ishim ýdaı ashıdy. Qazir betiń qyzaryp, júziń uıalatyn qanshama jaıttar bar. Ásirese, toı-tomalaqtaǵy jastardyń ersi bı qımyldaryn, uzyn kóılek kıip alyp, etegin alaı bir, bulaı bir kótere bılegen kelinshekterdiń qylyqtaryn, arzan sóz, jeńil kúlkige qurylǵan ázilder men asabalardyń uıymdastyrýymen bolatyn yńǵaısyz oıyn túrlerin kórip jaǵańdy ustaısyń. Sonda bul beınejazbalardan el-jurt qandaı ónege alyp jatyr deımin de... Ony kórgen jas bala keıin dál sol ersi bıdi «e-e-e, solaı bolady eken» dep qaıtalamasyna kim kepil?!
Iá, qazir barlyǵymyz áleýmettik jelimen tyǵyz baılanystamyz. Biraq sol baılanys quralyn ózgeniń kemshiligin kórsetýge paıdalanatynymyz ókinishti. Máselen, siz ózińiz jaıynda jaǵymsyz aqparat júkter me edińiz? Joq, árıne. Ásilinde, Siz áleýmettik jelige ózińizdiń baqytty ekenińizdi kórsetetin, ádemi beıneńizdi ǵana salasyz. Tanys- tamyrlaryńyzǵa ózińizdiń tolyqqandy ómir súrip jatqanyńyzdy, shetel asyp, jer kórip júrgenińizdi kórsetkińiz keledi. Jurttyń Sizdi jaqsy jaǵyńyzdan ǵana tanyǵanyn qalaısyz. Jalpy, kez kelgen adam ózgeniń kózine baqytty kóringisi keletini qalypty jaǵdaı ǵoı... Alaıda, biz sol áleýmettik jeliniń qoldaýynsyz-aq baqytty bola alamyz.
Ashshy bolsa da shyndyq. Aramyzda ózin zor, ózgeni qor sanaıtyndar kóp qazir. Áıtpese, olar jaman jaǵymyzdy hám kemshin tustarymyzdy jarıalaýǵa asyqpaǵan bolar edi... Onyń ornyna biz áleýmettik jelige kópke úlgi bolar is tyndyryp júrgen azamattardy, ádemi ádebimen el súısintken kelinderdi, talantymen tańqaldyrǵan balaqaılarymyz jaıynda kóbirek jarıalasaq jón bolar edi. Óıtkeni, naǵyz talanttar halyq arasynda júr. Mine, solarmen maqtanaıyq! Budan bylaı aǵaıynnyń jaman atyn shyǵaratyn beınejazbalarǵa jol bermeıik! Biz «jaqynyńdy jattaı syıla, jat janyńnan túńilsin», «Óser eldiń balasy birin-biri batyr deıdi...» degen dana halyqtyń urpaǵy emespiz be?! Endeshe, «Jaqsymyzdy asyryp, jamanymyzdy jasyraıyq!». Múmkindiginshe jaqsy sóz aıtýdan jalyqpaıyq! Eger ár adamnyń oıy taza, nıeti túzý, júregi aq bolsa bizde bári oń bolady. Sebebi, jaqsy nárseniń barlyǵy bizdi jaqsy oıǵa jeteleıdi. Al jaqsy oıdyń shyndyqqa aınalatynyn siz jaqsy bilesiz...
Taqyrypqa oraı
OIYŃYZ TAZA BOLSA, JOLYŃYZ ASHYQ!
Bir jolaýshy shól dalada kóp kún júrip, kezdeısoq bir saıaly aǵashqa kezdesedi. Aǵashtyń janyna baryp, kóleńkesine biraz otyrady da, shólin qandyrýdy oılaıdy. Sol sátte onyń aldynda sý quıylǵan qumyra paıda bolady. Jolaýshy shoshyp qalady. Biraq qatty shól shydatyp tura ma? Sýdy alyp, ishedi. Shóli qanǵan jolaýshy «endi bir tamaqtanyp alsam ǵoı, shirkin...» dep oılady. Sálden soń aldyna tamaq toly ústel paıda bolady. Tamaqqa toıyp alǵan jolaýshynyń demalǵysy keledi. Demde aldynda jatatyn oryn paıda bolady. Kenet oǵan «munyń bárin kim istep otyr, múmkin bul bir qubyjyq shyǵar» degen oı keledi. Áp-sátte aldynda qorqynyshty qubyjyq turady. «Bul meni óltirýi múmkin ǵoı» dep oılady jolaýshy, sol-aq eken, qubyjyq ony óltiredi.
Endeshe, oılaǵan oıymyz jaqsy bolsyn. Bul oıymyz taza bolsa, jolymyz ashyq bolady degendi bildiredi!