Iznık qalasynda ótken IV Dúnıejúzilik kóshpendiler oıyndary óz máresine jetti
Dúnıejúzilik kóshpendiler oıyny 2024 jyly Qazaqstanda ótedi. Bul týraly Ulttyq sport qaýymdastyǵynyń prezıdenti Islambek Saljanov óziniń Facebook paraqshasynda jazdy, dep habarlaıdy Almaty-akshamy.kz.
«Sizderge Túrkıadan súıinshi habar jetkizgim keledi. Keshe ǵana Túrkıanyń sport mınıstri Mehmet Kasapoglý QR Mádenıet jáne sport mınıstri Dáýren Áskerbekuly Abaevqa kelesi, V Dúnıejúzilik kóshpendiler oıyndaryn ótkizý estafetasyn tapsyrdy. Iaǵnı kelesi oıyndar 2024 jyly Qazaqstanda ótedi.
Al Iznık qalasynda ótken IV Dúnıejúzilik kóshpendiler oıyndary óz máresine jetti. Álemdik dodada bizdiń sportshylarymyz ulttyq sporttyń týyn jyqpaı, aıtýly nátıjelerge qol jetkizdi.
Máselen, kóshpendiler oıyndarynyń baǵdarlamasyna tuńǵysh engen kókparda Qazaqstan altyn júldelerdi enshiledi. Jarys barysynda bizdiń qurama Ózbekstan men Mońǵolıa quramalarynan ótip, aqtyq oıynda Qyrǵyzstan quramasyn 4:3 esebimen jeńdi.
Sondaı-aq, batyrymyz Marat Nyǵmatýllaev 60 keli salmaqta qazaq kúresinen altyn júldeni ıelense, 65 kelige deıingi salmaq dárejesindegi altyndy Zarına Sarıpova jeńip aldy.
Buǵan deıin Qazaqstan dástúrli sadaq atý men jamby atýdan kúmis júldelerdi enshilegen.
Kóshpendiler oıyndarynyń nátıjeleri boıynsha Qazaqstan quramasynyń qorjynynda 3 altyn, 3 kúmis, 2 qola júldesi bar. Bul tamasha nátıjeni kelesi kóshpendiler oıyndarynda eseleý - Ulttyq sport qaýymdastyǵynyń kelesi 2 jyldaǵy maqsaty dep bilemin.
El namysyn aqtaǵan barlyq sportshylarymyzdy shyn júrekten quttyqtaımyn!», - dep jazdy Islambek Saljanov.