Bıyl jahandyq ınflásıa tómendeýi múmkin. Byltyr kórsetkish 6,8 prosent. Al bıyl meje 5,8 prosentke deıin kemýi tıis.
Biraq mamandar ahýaldyń ońalýyna keri áser etetin qaýip-qaterdiń baryn jasyrmaıdy. Bul álemdegi geosaıası ahýalmen baılanysty, dep habarlaıdy Almaty-akshamy.kz.
Óıtkeni munyń bári taýar tasymalyn qıyndatady. Osynyń kesirinen logıstıkalyq shyǵyndar artyp, baǵa ósetini anyq. Iá, ınflásıanyń saldarynan qazir kóp elde azyq-túlik baǵasy sharyqtap tur. Álemdik sarapshylar bıyl ásirese shaı men shokolad baǵasy kúrt qymbattaıdy, deıdi.
«Dúnıejúzi 2040 jyly shokoladsyz qalýy múmkin», - deıdi álemdik sarapshylar.
Oǵan basty sebep klımattyń ózgerýi. Shokolad pen klımattyń qandaı baılanysy bar? Kakao óndirisine ne áser etedi? Jahandyq jylynýdyń áserinen 2030 jylǵa qaraı kakao aǵashyn ósirý tıimsiz bolady.
Qazirdiń ózinde keı afrıkalyq jáne ındonezıalyq fermerler kakao burshaqtaryn ósirýden bas tartyp jatyr.
Halyqaralyq kakao uıymynyń málimetinshe, keıingi 40 jylda shokolad aǵashtaryn ósirýge jaramdy aýmaqtardyń aýdany 40%-ke azaıdy. Taǵy 40 jyldan keıin Gana men Kot-d’Ivýardaǵy ortasha temperatýra 2 gradýsqa kóterilip, shokolad ındýstrıasy toqtaýy múmkin. Óıtkeni, bul eki el álemdik kakao eksportynyń 70%-in qamtıdy. Al boljam jyl saıyn kakaoǵa suranysty arttyryp jatyr.
Álemdik bırjalardaǵy kakao burshaqtarynyń quny aqpan basynda 6000 dollarǵa jetti. Iaǵnı jyl basynan beri bir jarym ese ósken. Bul 2022 jylǵy kórsetkishpen salystyrǵanda 130 prosentke kóp.