Erteń, 25 qazan kúni Respýblıka saraıynda álemdik baıqaýlardyń jeńimpazdary, Temirlan & Yernat dýetiniń alǵashqy «ALEM TOUR» atty jeke shyǵarmashylyq keshi ótedi.
Qazaqstannyń damý jolyndaǵy jetistikterin atap ótetin ulttyq mereke – Respýblıka kúnimen tuspa-tus kelgen konsertte dombyrashy jigitter ónersúıer qaýymnyń nazaryna halyqqa keńinen tanymal kúılerdi, álemdik kompozıtorlardyń shyǵarmalaryn jáne ózderiniń avtorlyq mýzykalary bar tamasha shoý-baǵdarlamalaryn usynady.
Qazaqtyń qasıetti dombyrasyn elimizde ǵana emes, alys-jaqyn shet elderde de tanytyp júrgen Temirlan & Yernat dýeti alǵashynda «Bastaý» degen atpen shyqqan. Keıinnen toptaryn óz esimderimen ataǵandy jón kórgen. Bıyl toptyń qurylǵanyna 7 jyl tolyp otyr. Osy ýaqyt aralyǵynda olar qasıetti aspapty álemniń birneshe memleketinde tanytyp qana qoımaı, júldelermen oralyp júrgeni de bar. Máselen, 2018 jyly AQSH-ta Arnold Shvarsenegger prodúser bolǵan World Championships úlken konkýrsynda altyn medal jeńip alsa, keıin Londondaǵy Golden Time Talent, Ispanıada ótken Music Box International, Túrkıadaǵy «Bridge TV Need for Fest» jáne Music World halyqaralyq mýzykalyq konkýrstarynda laýreat atanǵan.
Astana qalasyndaǵy Qazaq ulttyq óner ýnıversıtetinde 2-kýrs oqyp júrgende Dımash Qudaıbergenmen birge óner kórsetetin ansámbl quramyna qosylyp, «I am a Singer» baıqaýynda «Daıdıdaý» ánin dombyramen súıemeldegen. Dýbaıdaǵy búkilálemdik EXPO kórmesinde el atynan óner kórsetti. Tokıo Olımpıadasynda Qazaqstan mádenıetiniń ambassadory boldy. Búginde Air Astana ushaqtarynyń resmı bort mýzykasy men Astana qalasynyń temirjol vokzaldarynda, iri saýda ortalyqtarynda Temirlan & Yernat dýetiniń oryndaýyndaǵy shyǵarmalar jıi qoıylady.
Atadan qalǵan asyl murany qasterlep, dástúrin dáriptep júrgen shyǵarmashyl jastar ǵalamtorda da keńinen tanymal. Olardyń REELS-teri shaǵyn kıno ispetti. Qazaqtyń baıtaq dalasy men sheksiz jazıraly ólkesin kórsete otyryp oryndaǵan áýenderi beınebaıandaryn áserli ete túsedi.
Keıingi jyldary sheteldik kompozıtorlardyń shyǵarmalaryn dombyrada oınaý sánge aınaldy. Bul baǵytta Temirlan & Yernat dýeti de erekshe kózge túsedi. Mýzykadaǵy jeti nota – dombyranyń pernesine saı keledi, sol sebepti qos ishekti aspap kez kelgen sheteldik mýzykany oryndaýǵa qaýqarly ekenin dýettiń ónerinen ańǵarýǵa bolady.
Dástúrli pop-mýzyka stılinde óner kórsetetin jigitter ózderiniń avtorlyq shyǵarmalaryn da jazady. Búginde olar etnodekostıl jáne etnomodern baǵytyndaǵy áýenderdi kópshilikke usynady.
Búginde dombyrashy jigitterdiń ónerin tamashalaý halyq arasynda kádimgi trendke aınalǵan. Tabıǵatyn ózgertpeı, dámin buzbaı oryndaıtyn áýenderin áleýmettik jeli qoldanýshylary paraqshalarynda jıi paıdalanady.
«Bizdi tanymal etken – qolymyzdaǵy dombyra! Maqsatymyz – dástúrli áýenderdi ulttyq bolmysymyzdy saqtaı otyryp álemge tanytý, nasıhattaý», – deıdi ónerpazdar.
Iá, dombyranyń úni janyńdy terbetedi, kóńil kúıińdi kóteredi. Eń keremeti, keýdeńde asqaq kúsh-jiger, ómirge degen qushtarlyq, týǵan elińe, jerińe, ultyńa degen sheksiz mahabbat sezimin syılaıdy.
Endeshe, babalardyń syrly júreginen týǵan dástúrli áýender qazaq degen ult barda, osyndaı talantty uldar barda máńgi jasaı bermek. Qos ishektiń únine elitip, qazaqtyń rýhymen syrlasqyńyz kelse, Temirlan & Yernat dýetiniń konsertine kelińiz, qurmetti oqyrman!
«Aqshamnyń» anyqtamasy:
Temirlan Oljabaı men Ernat Naýryz – Astana qalasyndaǵy Qazaq ulttyq óner ýnıversıtetiniń túlekteri. Dýet ýnıversıtet qabyrǵasynda qurylǵan. Alǵashynda «Bastaý» degen atpen shyǵyp, keıinnen Temirlan & Yernat degen ataýdy tańdaǵan. Qazirgi tańda Astana qalasyndaǵy Roza Baǵlanova atyndaǵy «Qazaqkonsertte» qyzmet atqarady. Eki ónerpazdyń da otbasy bar.