Premer-mınıstrdiń orynbasary Serik Jumanǵarın dollardyń qymbattaýy elimizdegi azyq-túlik baǵasyna áser etpeıtinin aıtty, dep habarlaıdy aqshamnews.kz.
«Biz áleýmettik mańyzy bar taýardyń 10 túri boıynsha (un, tuz, kúrish, makaron, maı, kartop, qoı eti, sıyr eti, sábiz) ózimizdi 100% qamtamasyz etip otyrmyz. 14 taýar boıynsha qamtamasyz etý kórsetkishi – 80%, 5 taýar boıynsha ımportqa táýeldilik bar. Qus etimen qamtamasyz etý kórsetkishi – 73%, shujyq (kolbasa) – 60%, balyq – 60%, irimshik pen súzbe – 46%, qant – 44%.
Qazaqstanda óndirilmeıtin kókónister men jemisterdiń keıbir túrleri mysaly, apelsın, banan, lımon jáne taǵy basqasy boıynsha táýekelder bar. Olar qymbattaýy múmkin. Biraq aıtarlyqtaı emes. Biz monıtorıń júrgizip jatyrmyz. Sońǵy aptada eshteńe qymbattaǵan joq», - dedi Serik Jumanǵarın Úkimettegi baspasóz máslıhatynda.
Onyń aıtýynsha, dúkenderdegi baǵa baqylaýda. Aldaǵy ýaqytta elimizde óspeıtin sıtrýs jemisteriniń baǵasy tómendeýi múmkin.
«Bizde óspeıtin apelsın, lımon jáne taǵy basqa sıtrýs jemisterine toqtalaıyn. Qazir Eýrazıalyq ekonomıkalyq komısıa (EEK) alańynda osy ónim túrlerine kedendik ákelý bajyn tómendetý máselesin qarastyryp jatyr.
Elimizde jylyjaı salatyn kásiporyndar bar. Joǵarydaǵy jaǵdaı olardyń qyzmetine qalaı áser etetinin, naryqta qysym bolmaıtynyn qarastyramyz. Jaqynda biz sheshimdi qabyldaımyz. Eger biz kásipkerlerimizge qaýip tóndirmeıtinimizge kózimiz jetse, onda baj kólemin azaıtamyz. Meniń oıymsha, bul valúta baǵamynyń áserin joıady», - dedi vıse-premer.