Bul týraly Bilim jáne ǵylym mınıstri Asqat Aımaǵambetov aıtty, dep habarlaıdy Almaty-akshamy.kz 24.kz-ke silteme jasap.
"Áriptestermen jınalysta joǵary oqý ornynan keıingi bilim berý boıynsha keıbir máselelerdi talqyladyq. Kelesi usynystar aıtyldy:
Doktoranttarǵa Qazaqstan tarıhy, qazaq fılosofıasy, qazaq tili men ádebıeti sıaqty gýmanıtarlyq beıindegi birqatar baǵyttyń ereksheligin eskere otyryp, qoldanystaǵy talaptarǵa (WoS jáne Scopus tizbesine kiretin basylymdarda maqalalar jarıalaý) birneshe balama nusqalardy qosý usynyldy.
Atap aıtqanda: a) KOKSON tizimine engizilgen jýrnaldarda 5 maqala jáne ǵylymı konferensıalardan 2 materıal; b) senimdi baspalarda monografıa shyǵarý (Elsevier, Brill, CRC Press, DeGruyter, Edward Elgar Publishing, Springer Nature jáne basqalary), sondaı-aq US News Best Global Universities Rankings, Academic Ranking of World Universities nemese Times Higher Education World University reıtıńiniń top-100 quramyna kiretin ýnıversıtetterde.
Esterińizge sala keteıin, byltyr KOKSON tizimine engizilgen ǵylymı jýrnaldarǵa qoıylatyn talaptardy edáýir kúsheıttik jáne tizimnen álsiz jýrnaldardy alyp tastap, eski tizimdi tolyǵymen jańarttyq. Sol sebepti bul sheshimdi jumystyń qısyndy jalǵasy dep sanaımyn. Árıne, tolyqqandy dáıeksóz júıesi boıynsha jumys sozylyp ketti, biraq soǵan qaramastan onyń qorytyndysy shyǵarylady. Sondaı-aq, WoS jáne Scopus tizimine engizilgen jáne sanksıaǵa baılanysty derekter qorynan joıylǵan ǵylymı jýrnaldarda granttyq qarjylandyrý aıasynda jarıalanǵan qazaqstandyq ǵalymdardyń maqalalaryn, eger bul maqalalar buǵan deıin jarıalanýǵa qabyldanǵan bolsa, olardy taný múmkindigi talqylandy.
Budan bólek, engizý merzimi keıinge shegerile otyryp, (2023 jyldan bastap) mynadaı sharalar usynyldy: Doktoranttardy qabyldaý boıynsha. Doktorantýraǵa túsý kezinde úmitkerlerge ózderiniń bolashaq dısertasıasynyń ǵylymı negizdemesin (research proposal) usyný usynyldy. Doktoranttardyń zertteý quzyrettiligi boıynsha. Buǵan deıin biz doktoranttardyń «Akademıalyq hat», «Ǵylymı zertteý ádisteri» pánderin mindetti túrde oqýyn engizdik. Bul quzyretter kez kelgen doktorantqa ǵylymı zertteýlerdi óz betinshe oryndaý úshin qajet. Osy pánderdi meńgerý úshin biliktilik emtıhanyn ótkizý usynylady. Ǵylymı basshylyq boıynsha.
Bir ǵylymı jetekshige 15 doktorant, keıin birinshisi qorǵaýdan óte almaǵan jaǵdaıda taǵy beseýin bekitý tájirıbesi durys emes. Búgingi tańda ǵylymı jetekshiler kóp jaǵdaıda doktoranttarmen jumys isteýge jetkilikti kóńil men ýaqyt bólmeıdi. Bul máseleni sheshý úshin júıeli sharalar qajet", - dedi mınıstr.