Almatyda nashaqorlyqqa jáne esirtkiniń zańsyz aınalymyna qarsy kúres kúnine arnalǵan jyl saıynǵy grepplıng AIGA jáne brazılıalyq jıý-jıtsý boıynsha «Sagadat batyr Open» halyqaralyq ashyq týrnıri ótti, dep habarlaıdy almaty-akshamy.kz.
Týrnırdi «Alataý jastary» jastar birlestigi, Almaty oblysy máslıhatynyń jáne İshki ister mınıstrliginiń qoldaýymen Saǵadat Nurmaǵambetov atyndaǵy sport klýby uıymdastyrdy. Týrnırdiń basty maqsaty - sporttyń ataýly túrin nasıhattap, salaýatty ómir saltyn ustaýǵa shaqyrý.
İs-shara barysynda Saǵadat Nurmaǵambetov atyndaǵy sport klýbynyń prezıdenti Erbolat Turymbetov quttyqtaý sóz sóıledi. Ol jastardy sportpen shuǵyldanýǵa tartýǵa arnalǵan jyl saıynǵy týrnırdi ótkizýdiń mańyzdylyǵy týraly aıtty.
QR İİM esirtki qylmysyna qarsy is-qımyl departamenti bastyǵynyń orynbasary Baqytjan Ámirhanov óz sózinde elimizde nashaqorlyqqa qarsy kúres boıynsha belsendi jumys júrgizilip jatqanyn, al balalardy dene shynyqtyrý jáne sportpen shuǵyldanýǵa tartý jaman ádettermen kúreste mańyzdy ról atqaratynyn aıtty. Ol sondaı-aq İshki ister mınıstri men Týrızm jáne sport mınıstriniń atynan quttyqtaýlardy jetkizdi. Mınıstrlik ókilderiniń aıtýynsha, mundaı is-sharalar azamattarymyzdyń fızıkalyq jáne rýhanı damýyna yqpal etip qana qoımaı, óskeleń urpaq úshin salaýatty ómir saltynyń úlgisi bolyp tabylady.
«Týrnır óte joǵary deńgeıde ótti. Bizdiń jigitterdiń ónerine óte rızamyn. Alǵashqy eki oryndy Samat Ramazanov atyndaǵy akademıa men Saǵadat Nurmaǵambetov atyndaǵy klýbtyń tárbıelenýshi-sportshylary jeńip aldy. Men muny maqtan tuta otyryp, árqashan óz daǵdylarym men tájirıbemmen bólisýge daıyn ekenimdi aıtqym keledi. Kóptegen jarystarda meniń oqýshylarym joǵary nátıjeler kórsetip, álemdik arenada elimizdiń namysyn laıyqty qorǵaıdy. Júldeli oryn ala almaǵan barlyq djıtserler men grepplerlerge úmitterińizdi úzbeńizder degim keledi. Sizderde barlyǵy alda. Búgingi týrnırge qatysýlaryńyz - ózindik qurmetke laıyq. Ózderińizge senip, maqsattaryńyzǵa qaraı umtylyńyzdar»,- dedi «Alataý jastary» jastar uıymynyń tóraǵasy jáne bas uıymdastyrýshy Nursultan Orynbasarov.
Ol sondaı-aq AMANAT partıasynyń, «Jastar Rýhy» Jastar qanatynyń, oblystyq jáne aýdandyq ákimdikterdiń ókilderine, seriktesterge, İİM ardagerlerine, oblystyq jáne aýdandyq máslıhat depýtattaryna, blogerlerge jáne barlyq qoldaýshy ata-analarǵa belsendi qatysqany úshin jeke alǵysyn bildirdi.
AMANAT partıasy «Jastar Rýhy» Jastar qanatynyń tóraǵasy Aqerke Iskanderova:
«Búgin ótip jatqan úlken sporttyq sharamen shyn júrekten quttyqtaımyn. Uıymdastyrýshylarǵa esirtkisiz qoǵam qurýda jáne jastar arasynda salaýatty ómir saltyn nasıhattaýda jasap jatqan jumystary úshin alǵys aıtamyn. «AMANAT» partıasy men «Jastar Rýhy» da osyndaı bastamalarǵa árdaıym qoldaý kórsetedi. Jastarymyz halyqaralyq arenalarda da týymyzdy jelbiretip júre bersin!» - dedi.
İs-sharaǵa depýtattar, sportshylar, jastar uıymdarynyń, oblystyq jáne aýdandyq ákimdikterdiń ókilderi, İİM ardagerleri qonaq retinde qatysty. Jarysqa 4 pen 15 jas aralyǵyndaǵy 300-den astam jas sportshylar qatysyp, elimizdiń ár óńirlerinen, sondaı-aq kórshi memleketterden kelgen komandalardy qurady. Olardyń arasynda Almaty oblystyq №1 balalar úıiniń tárbıelenýshileri de boldy.
Júldeli oryndardy jeńip alǵan qatysýshylar men komandalarǵa seriktesterden alǵys hattar, arnaıy medaldar, aqshalaı jáne baǵaly syılyqtar tabystaldy.