"Shanshar" ázil-ysqaq teatryn bilmeıtin qazaq joq shyǵar?! Ásirese mıllenıal býyn Ýálıbek Ábdiraıymov jetekshilik etken teatrdyń ár qoıylymyn jatqa biledi. El arasynda "Shanshardyń" shyndyqqa aınalǵan ázilderi jeldeı esip, jeli qoldanýshylary tańdanystaryn jasyrmady. Aqshamnews.kz tilshisi nostalgıa jasap, jurt jadynda jattalǵan ázilderdi eske túsirip kórdi.
"Qarnyń ashsa, balyq aýlap je!"
Bul "Shanshar" teatrynyń sý tasqyny jaıly sóz etiletin "Júzbe-júz" atty qoıylymyndaǵy tanymal tirkes. Sheneýnikpen suhbat retinde kórsetiletin qoıylym bıliktiń tasqyn kezindegi "sharasyzdyǵyn" astyrtyn synǵa alady. Bul qoıylym 2005 jyly sahnalaǵan edi.
Bul ázildi kópshilik 2024 jyly bolǵan eldegi sý tasqynymen baılanystyrady.
Eske salaıyq, 2024 jyldyń kókteminde Qazaqstanda keıingi ondaǵan jyldaǵy eń aýqymdy sý tasqyny boldy. Prezıdent Toqaev bul apatty eldegi "sońǵy 80 jyldaǵy eń iri apat bolýy múmkin" dep ataǵan edi. 10 óńirde tótenshe jaǵdaı jarıalanyp, 118 200 adam evakýasıalandy. Olardyń 44 300-i – balalar. Shamamen 6 000 úı sý astynda qaldy, al 18 sáýir deregi boıynsha keminde 7 adam qaza tapty.
Akter Nurjan Tólendıev bul qoıylym jaıly bir pikirinde:
"Habarlasyp otyrǵan áıel "ashpyz" dese, "nanǵa maı jaǵyp je" deıdi. Bylaı qarasańi ázil bolǵanymen, ashýyńa, shamyńa tıetin áńgime ǵoı. Bul - satıra", - degen edi osy qoıylymdaǵy akter Tólendıev.
sýret: sarinform.ru
Qaıyrymdylyq qorlary týraly 15 jyl burynǵy "shyndyq"
"Shanshar" qaıyrymdylyq qorlary jaıly taqyrypty da osydan 15 jyl buryn qaýzaǵan eken. Nurjan Tólendıev pen Nurjan Qulshynbaev basty rólde oınaıtyn qoıylymda otbasy jalǵan jaǵdaıy joq otbasy keıpin tanytyp, qaıyrymdylyq qorynan aqsha óndirýdi kózdeıdi.
Bul qoıylym jurtqa byltyrǵy Perızat Qaırattyń shýly oqıǵasyn eske saldy.
Perızat Qaırat 2021 jyldan 2024 jylǵa deıin túrli qaıyrymdylyq aksıalary arqyly jalpy somasy 3,5 mıllıard teńge kóleminde qarajat jınap, ony óz paıdasyna jaratqany úshin kináli dep tanyldy. Shildede oǵan qatysty sot úkimi shyǵyp 10 jylǵa sottalǵan edi. Perızat Qaırat jymqyrǵan qarajattar negizinen balalarǵa, sý tasqynynan zardap shekkenderge jáne Palestına halqyna kómek kórsetý úshin jınalǵan dep kórsetilgen.
sýret: tengrinews.kz/Sanjar Mýstafın
"Aq tyrna" "Shalabaı atalaǵan" táýipti meńzegen be?
2009 jyly sahnalanǵan "Aq tyrna" skechiniń avtory - Nurjan Tólendıev. Akter bul qoıylymnyń qalaı jazylǵany jaıly bylaısha áńgimeleıdi.
"Sol jyly Túrkistanda Iassaýı babamyzdyń kesenesi mańynda bir top aq kıimdi adamdardy baıqadym. 300-ge jýyq adam qoldaryna aq tý ustap, kesenege qaraı bet alyp bara jatyr eken. Ne isteıtinderin kóreıinshi dep, birge ilestim. Bir kezde ishindegi bireýi toqtamaı taqpaq oqydy. Sol sátti jattap alyp, teatrǵa kelip, sahnalaý kerek dedim. Juldyzaıǵa (Juldyzaı Dúısenbıeva - aktrısa - esk.) aıtyp edim, ol aınytpaı salyp berdi", - dedi Tólendıev buryn bergen suhbattarynyń birinde.
Al qazaqstandyqtar bul ázildi emshi Ulyqbek Smanovtyń oqıǵasymen baılanystyrdy. Shymkentten shyqqan emshi balalar úıinen asyrap alǵan balalardy úsh jyl boıy ıt pen mysyqtyń etimen tamaqtandyryp, túrli qorlyq kórsetkeni sóz bolǵan edi. Byltyr Smanovtyń jelide "Shalabaı atamnyń árýaǵy" dep án salyp, birneshe adamdy "emdep" jatqan beınesi tarap, jurtty shýlatqan bolatyn.
"Kıno túsiremiz": Djekı Chan shynymen qazaqstandyq fılmde oınamaq
Tólendıev taratqan taǵy bir tanymal ázil - "Rejıser" qoıylymy. Aktrısa Juldyzaı Dúısenbıevamen birge oınaıtyn qoıylymda Djekı Chan, Tom Krýz syndy tanymal akterlerdi fılmge túsiretini jaıly aıtylady. Bul kórinis te 2009 jyly qoıylǵan edi.
"Shanshar"-dyń bul ázili de shyndyqqa aınalyp bıyl áıgili akter Djekı Chan Qazaqstanǵa kelip, otandyq medıakompanıanyń jobasynda boı kórsetpek. Medıakompanıanyń málimetinshe, álemdik kıno ańyzynyń qatysýymen Qazaqstanda áıgili “Qudaıdyń saýyttary” fılminiń jańa bólimi túsiriledi.
"Biz Djekı Channyń Almatyǵa kelgen rezonansty saparynyń mán-jaıyn resmı túrde ashamyz. Bul kúlttik franshızanyń jańa fılmi - “Qudaıdyń saýyttary: Últımatým” jobasyna baılanysty", - delingen kompanıa habarlamasynda.
