«Taza Qazaqstan» aksıasy aıasynda İle Alataýy memlekettik ulttyq tabıǵı parkiniń Kókjaılaý shatqalynda «Halyk ormany» jobasy bastaldy. Jobany «Halyk» qory Ekologıa jáne tabıǵı resýrstar mınıstrligimen birlesip iske qosty. Bul bastama ekologıalyq jaǵdaıdy jaqsartýǵa, qoǵamnyń ekologıalyq mádenıetin arttyrýǵa, tabıǵatty qorǵaýǵa jáne jasyl jelekter sanyn arttyrýǵa baǵyttalǵan. 5 jylǵa eseptelgen jobaǵa 1 mıllıard teńge bólingen. Osy ýaqyt ishinde eldiń úsh óńirinde 4 mıllıonnan asa aǵash otyrǵyzý josparlanyp otyr.
Ideıa kóktemde ótken GreenAct ekochellendjinen bastaý alǵan. Sol kezde eldiń túkpir-túkpirinde myńdaǵan adam – oqýshylar, kompanıa qyzmetkerleri, jaı ǵana belsendi azamattar saıabaqtardy tazalap, qoqysty suryptap, kóshet otyrǵyzdy. Endi bastama uzaq merzimdi ekobaǵdarlamaǵa aınaldy.
Ekoaksıaǵa Ekologıa jáne tabıǵı resýrstar vıse-mınıstri Nurken Shárbıev, belgili ekolog Mels Eleýsizov, Q.Sátbaev atyndaǵy Qazaq ulttyq tehnıkalyq ýnıversıtetiniń rektory Meıram Begentaev, İle Alataýy ulttyq parkiniń qyzmetkerleri, eriktiler, ekologıa janashyrlary, BAQ ókilderi, Almaty qalasy JOO stýdentteri men oqýshylary, jalpy sany 600-den astam adam qatysty.
İle Alataýy memlekettik ulttyq tabıǵı parkiniń dırektory Elnur Ahmetovtyń aıtýynsha, taýdaǵy orman qoryn kóbeıtý jumystary aldaǵy ýaqytta da júıeli túrde jalǵasyn tabady. 1 gektar jerge egilgen 625 shyrsha Ulttyq park qyzmetkerleriniń jiti qadaǵalaýymen otyrǵyzyldy. Ár qyzmetker aǵash egý erejesin kórsetip, túsindirip berdi.
Aksıaǵa jasy úlkender de atsalysty. Almaty turǵyny, zeınetker Aıgúl apaı tabıǵatqa janashyrlyqty urpaq tárbıesiniń bir bóligi dep esepteıdi: «Jastarǵa sózben emes, ispen úlgi bolýymyz kerek. Aǵash egý – burynnan kele jatqan jaqsy dástúr. Osyndaı bastamalar jıi bolsa eken. Aksıa týraly áleýmettik jeliden bilip keldik. Óz qolymyzben ekken aǵash erteń jaıqalyp ósip ketsin dep tileımiz! Igilikti iske úles qosqanymyzǵa qýanyshtymyz!», – dedi ol.
Shara barysynda eriktiler men tabıǵatqa beıjaı qaramaıtyn barlyq jandar halyqty «Halyk ormany» jobasyna qosylýǵa shaqyrdy. Árbir adamnyń qoldaýy eldegi jasyl aımaqtardyń artýyna jáne ekologıany saqtaýǵa múmkindik bereri sózsiz. Jastar arasynda ekologıalyq mádenıetti damytýǵa, jas urpaqty tabıǵatty aıalaýǵa shaqyrǵan ekoaksıa jaı ǵana aǵash otyrǵyzý emes, Almaty qalasynyń ekologıalyq jaǵdaıyn jaqsartýǵa, Qazaqstan tabıǵatyn saqtaý men qorǵaýǵa jasalǵan aýqymdy mańyzdy qadam boldy.
TAQYRYPQA ORAI:
Nurken SHÁRBIEV,
Ekologıa jáne tabıǵı resýrstar vıse-mınıstri:
– Jobanyń alǵashqy kezeńi Shyǵys Qazaqstandaǵy «Semeı ormany» aýmaǵynda bastaldy. Júzdegen gektar órtengen aımaqqa alǵashqy 800 kóshet egildi. Endi mine – İle Alataýynda jalǵasýda. Munda 5 gektar aýmaqqa 14 myń shrenk shyrshasy otyrǵyzylady. Al búgin Kókjaılaý shatqalynda 625 túp aǵash boı túzeıtin bolady. Qazirgi tańda elimizde «Taza Qazaqstan» aksıasy ótip jatyr. Jalpy bir jylda 996 ekologıalyq sharalar ótti. Oǵan 4 mln 200 myń adam qatysty. Aýqymdy sharalar aıasynda respýblıka aýmaǵynda 2,5 mıllıonǵa jýyq kóshet otyrǵyzylyp, 600 tonna qoqys tazalandy. Elimizdiń ár óńirinde osy syndy aksıalar jalǵasyn tabýda. Búgin İle Alataýy ulttyq parkiniń aýmaǵynyń eń ádemi, eń kórikti Kókjaılaý shatqalynda ótip jatqan sharaǵa kýá bolyp otyrmyz. Tabıǵatty qorǵaý – bir rettik is-shara emes, qorshaǵan ortany qorǵaý mádenıetin qalyptastyrý. Biz tabıǵatqa janashyrlyq tanytpaıynsha, ekonomıkalyq ósim de uzaqqa barmaıdy. «Halyk ormany» jáne osyndaı jobalar – ekologıalyq mádenıetti ómirimizdiń tabıǵı bóligine aınaldyrý jolyndaǵy mańyzdy qadam.
Dáýren SARTAEV,
Halyk Basqarma Tóraǵasynyń orynbasary:
– «Halyk ormany» jobasy Semeıde bastalyp, odan keıin Astanada, búgin Almatyda jalǵasyn tapty. Bul aksıa jastar úshin, alǵashqy qatysýshylar úshin tájirıbe bolýy múmkin. Aýamyz taza, taýymyz jasyl, aǵashtar kóp bolsyn. Osy sharaǵa qatysyp, qoldaǵandaryńyz úshin alǵys aıtamyn.
Elnur AHMETOV,
İle-Alataýy memlekettik ulttyq tabıǵı parkiniń bas dırektory:
– Aǵash egý aksıasy «Halyk» qory, Ekologıa jáne tabıǵı resýrstar mınıstrligi jáne İle Alataýy ulttyq tabıǵı parkiniń ózara kelisimine baılanysty júzege asty. «Halyk ormany» jobasy barysynda 1 gektar jerge 625 shyrsha otyrǵyzyldy. Shrenk shyrshasy – Almaty qalasy İle Alataýy bókterine, Tán-SHan taý silemderine burynnan jersinip keledi. Jalpy, Ulttyq park aýmaǵynda «Taza Qazaqstan» jalpyulttyq jobasyn iske asyrý boıynsha 97 600 adamdy qamtyǵan 249 is-shara ótkizildi. İs-shara nátıjesinde 8 200 túp aǵash otyrǵyzylyp, 11,5 tonna qoqys jınaldy. Sondaı-aq, qorshaǵan ortany qorǵaý jáne qaldyqtardy basqarý boıynsha 2025 jyldyń 9 aıynda park aýmaǵynan 886 tonna qatty turmystyq qaldyqtar shyǵarylsa, qatty turmystyq qaldyqtardy bólek jınaý úshin 32 jabyq alańǵa qoqys jınaýǵa arnalǵan 365 konteıner ornatyldy.