QR Oqý-aǵartý mınıstrliginiń uıymdastyrýymen Nazarbaev ýnıversıtetiniń bazasynda Astana qalasy, Aqmola, Pavlodar, Qostanaı jáne Soltústik Qazaqstan oblystary memlekettik mektepteri dırektorlarynyń qatysýymen «Zamanaýı mektepti basqarý: trendter jáne bolashaq» taqyrybyndaǵy forýmynda bilim berý salasyndaǵy ózekti máseleler talqylandy, dep habarlady almaty-akshamy.kz.
TEDx formatyndaǵy ınteraktıvti sesıaǵa Oqý-aǵartý mınıstri Ǵanı Beısembaev qatysty. Elimizdiń bas ustazy otandyq bilim berý júıesin damytýdyń mańyzdy aspektilerine toqtalyp, kadrlyq áleýetti arttyrýǵa erekshe kóńil bólinetinin atap ótti.
«Memleket basshysynyń qoldaýymen tórt jyl ishinde pedagogterdiń jalaqysy 100%-ǵa, ıaǵnı eki ese ósti. 2023 jyldyń qyrkúıeginde mektepke deıingi uıymdardaǵy pedagogterdiń jalaqysy 30%-ǵa ósti. Bul baǵyttaǵy jumystar, ıaǵnı pedagogterdi qoldaý sharalary jalǵasady. Osy jyldan bastap bilim berý qyzmetkerlerin kótermeleý júıesi, sondaı-aq bilim berý uıymdary basshylary men olardyń orynbasarlarynyń jalaqysy qaıta qaralatyn bolady», - dedi Ǵanı Beısembaev.
Vedomstvo basshysynyń aıtýynsha, búginde mınıstrlik ulttyq bilim berý derekter bazasyn jetildirý baǵytynda jumys júrgizýde. Onda bilim berý uıymy týraly málimetter, pedagogtiń jeke derekteri, bilim alýshylardyń úlgerimi men bilim sapasy jáne t.b. kórsetiledi.
Kezdesýge Astana qalasy men Qazaqstannyń tórt soltústik oblysyndaǵy orta bilim berý uıymdarynyń bir jarym myńǵa jýyq basshysy qatysty. Olar úshin dıalog alańy ashyldy. Onda jıynǵa qatysýshylarǵa bilim berý salasyndaǵy baqylaý jáne monıtorıń is-sharalarynyń qorytyndylary jáne bıylǵy jylǵa arnalǵan josparlar týraly aıtyldy. Atap aıtqanda: bilim berý sapasyn arttyrý, ınklúzıvti jáne arnaıy bilim berýdi damytý, sıfrlandyrý, balalardyń qaýipsizdigin qamtamasyz etý jáne basqalar.
Esterińizge sala keteıik, buǵan deıin mınıstr Almaty qalasy, Túrkistan, Jetisý jáne Almaty oblystary mektepteriniń dırektorlarymen kezdesýler ótkizgen bolatyn. Forým elimizdiń basqa óńirlerinde de jalǵasady.