Dırektorlar bir mektepti 7 jyldan artyq merzim basqara almaıdy.
Bul jaıynda Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy Almaty-akshamy.kz QazAqparatqa silteme jasap.
«Bilim berý uıymyna taǵaıyndalǵannan kúnnen bastap 4 jyl laýazymdy qyzmette bolǵan basshylar rotasıalanady. Bul rette birinshi basshynyń bir bilim berý uıymynda laýazymdy qyzmet atqarýyna ruqsat etilgen eń uzaq merzim 7 jyldan aspaıdy», - delingen Úkimet basshysy orynbasarynyń jaýabynda.
Onyń atap ótýinshe, rotasıa júrgizý úshin bilim berý basqarmasynyń kadr qyzmeti aýysýy tıis birinshi basshylardyń tizimin ázirleıdi. Pedagogtardy attestasıadan ótkizý erejesi men tártibine sáıkes, birinshi basshy jumysynyń tıimdilik kórsetkishteri boıynsha esep túziledi. Ol jumys baǵyttary boıynsha 10-nan astam ólshemshartty qamtıdy.
«Tıimdilik kórsetkishterine qatysty málimetterdi bilim berý basqarmalarynyń, ádistemelik kabınetterdiń, buqaralyq aqparat quraldarynyń, bilim salasyndaǵy qoǵamdyq birlestikterdiń ókilderinen jasaqtalǵan jáne materıaldardy shynaıy ári jan-jaqty zerdeleý úshin konsýltatıvtik-keńes organy sanalatyn komısıa qaraıdy. Atestattaý erejelerinde kórsetkishter boıynsha ólshemsharttar men tıisti baldar aıqyndalǵan. Bul jemqorlyq táýekelderin tómendetedi. Rotasıalanatyn birinshi basshy qoıylǵan baldyń durystyǵyn, negizdiligin qaıtadan teksere alady», - dedi Eraly Toǵjanov.