«Alla – Shyǵystan shyqqan Dior-dyń marjany»
Azıalyq kelbetimen álemdi moıyndatqan Alla Ilchýn týraly fılm Almatyda tanystyryldy, dep habarlaıdy Almaty-akshamy.kz «Habar 24» telearnasyna silteme jasap.
Alla Ilchýn týraly derekti fılm – jazýshy, dıplomat Berlın Irıshev eńbeginiń jemisi. Ol ótken ǵasyrdyń ortasyndaǵy sán áleminiń juldyzyn zerttep, qany qazaq ekenin dáleldedi. Krıstıan Dıordyń mýzasy týraly 4 kitap jazdy. Tarıhı derekter men 7 memlekettiń muraǵatyndaǵy taspalanǵan beınelerdi jınaqtap derekti fılm túsirdi.
«Dúnıejúzilik markamen baılanysty bolǵan tarıhty ózgertý óte qıyn. Ol úshin óte kóp eńbek jasaý kerek. Sondyqtan biz fılmdi ustap turdyq. Fransıanyń kózqarasyn bilip, Dıordyń ózi bizdi qoldap, Sosyn myna Qytaıdan shyqqan kitap boıynsha bizdiń fılmniń bári rastaldy», - deıdi fılm prodúseri ári rejıseri Berlın Irıshev.
Berlın Irıshevtiń aıtýynsha, Allanyń jalǵyz urpaǵy Mark Parıjde turady, buryn áskerı bolǵan, qazir fotograf bolyp jumys isteıdi. Fılmde sondaı-aq Allamen aralasqan, birge qyzmet etken dostary, áriptesteri, fransýz jáne reseılik tanymal ónertanýshylar boı kórsetedi.
«Ótken ǵasyrdyń ortasyna deıin tek qana Eýropalyq modelder ǵana sán kórsetetin. Qazaqtan shyqqan Alla Ilchýnnyń arqasynda joǵary sán áleminde azıalyqtar paıda boldy. Onyń qazaq qyzy bolǵany biz úshin mártebe. Al Berlın Irıshevtiń eńbeginiń arqasynda elimizdiń aty álemge jańa qyrynan tanyldy», - deıdi fılmniń demeýshisi Janna Kan.
Avtordyń aıtýynsha, fılm úsh bólimnen turady. Birinshi bólimde ártúrli memleketterden jınaǵan qujattar qamtyldy. Ekinshi bólimde sán úıleri usynǵan kadrlar, fotolar men Alla kıgen kıimder usynylǵan. Úshinshi bólim buryn Alla týraly beımálim bolǵan aqparattardy qamtıdy.