Qazaq ultynyń kóshbasshylarynyń biri, Qazaqstan Kompartıasy Ortalyq Komıtetiniń birinshi hatshysy – Dinmuhamed Qonaevtyń jeke qujattary memlekettik saqtaýǵa berildi.
Dinmuhamed Ahmetulynyń jeke arhıvi Qazaqstan Respýblıkasy Prezıdentiniń Arhıvine tapsyryldy. Tarıhı qujattar Qonaevtyń murageri, «Áýezov úıi» ǵylymı-mádenı ortalyǵynyń jetekshisi Dıar Asqaruly Qonaev (Asqar Ahmetuly Qonaevtyń balasy) tapsyrdy.
«Bizdiń arhıvte Dinmuhamed Ahmetulynyń qyzmet kezindegi qujattary saqtaýda. Muraǵatta onyń Qazaqstan Kompartıasynyń Ortalyq komıtetin basqarǵan kezeńde qol qoıǵan qujattary, iskerlik hat-habarlary, baıandamalar jáne jazbalary bar. Dinmuhamed Ahmetuly Qonaev murasy Prezıdent Arhıviniń maqtanyshyna aınalaryna senimdimin», – dedi QR Prezıdenti Arhıviniń dırektory Álıa Mustafına.
Aıta ketken jón, arhıvke berilgen qujattar negizinde QR Prezıdenti Arhıvinde Dinmuhamed Ahmetuly Qonaevtyń jeke tektik qory jasalady, bul qaıratkerdiń ómirbaıanyn tolyq zerdeleýge múmkindik beredi ári sol arqyly Qazaqstannyń tarıhyna jańa derekter men dáıekter tolyqtyrylatyndyǵyn bildiredi.
«Bul qujattar muraǵatqa tapsyrylǵannan keıin ne kútiledi? Biz ǵylymı saraptama jasap, qujattarǵa óńdeý júrgizemiz, sondaı-aq keńeıtilgen ǵylymı-anyqtamalyq apparat kómegimen egjeı-tegjeıli tizimdemeler jasaımyz. Barlyq qujattarǵa sıpattama berilip, olar memlekettik esepke alynady, ár bet nómirlenedi», – dedi Álıa Mustafına.