Jyl saıyn 37 myńnan astam qaterli isik tirkeledi.
Astanada proton terapıasyn júrgizetin onkologıalyq ortalyq ashylady, dep habarlaıdy Almaty-akshamy.kz Úkimettiń baspasóz qyzmetine silteme jasap.
Premer-mınıstr Álıhan Smaıylov Qazaqstanda alǵash ret ashylatyn zamanaýı medısınalyq ortalyqta boldy.
"Jaǵdaıdy jaqsartý úshin biz Astanada onkologıalyq ortalyq quryp jatyrmyz. Bul – kúrdeli nysan", - dedi Álıhan Smaıylov.
Búdjettik ınvestısıalyq jobany júzege asyrý úshin Shveısarıa men AQSH-tan jetekshi halyqaralyq kompanıalar tartylǵan.
"Búgingi tańda qurylys jumystary 90%-ke aıaqtaldy, atap aıtqanda, sáýlelik jáne ıadrolyq medısına ortalyqtary, protondyq terapıa ortalyǵy, ákimshilik jáne tehnıkalyq bloktary bar 210 tósektik emdeý-dıagnostıkalyq korpýs salyndy", - delingen habarlamada.
Medısınalyq mekemeniń korpýstary qalalyq ınjenerlik sý, jylý jáne elektrmen jabdyqtaý jelilerine qosylǵan. Ǵımarattarda kabınetter men palatalardy árleý jumystary aıaqtaldy.
Ulttyq ǵylymı onkologıalyq ortalyqtyń basshysy Sanjar Shalekenov mekemede jylyna 6 myń pasıentke radıonýklıdtik dıagnostıka júrgizý, radıofarmpreparattar shyǵarý jáne radıonýklıdtik terapıa júrgizý josparlanǵanyn aıtty.
"Bizde radıo-sáýlelik emdeý júrgizetin bes apparat bar: bireýi kontaktili sáýlelik terapıaǵa, ekinshisi kontaktisiz emdeýge arnalǵan", - dedi ol.
Ulttyq ǵylymı onkologıalyq ortalyqta protondyq ortalyq jumys isteıdi. Jylyna 800-1000 syrqat em alady.
"Onkogematologıa ortalyǵy da qarastyrylǵan. Munda súıek kemigin transplantasıalaýǵa arnalǵan 15 tósek bar. Bul múldem sterıldi, taza. Munda jylyna 180-den 200-ge deıin transplantasıa jasaý josparlanyp jatyr", - deıdi Sanjar Shalekenov.
Onyń aıtýynsha, bul respýblıkadaǵy naýqastardyń úshten birin emdeýge múmkindik beredi. Al ekinshi ǵylymı-bilim berý ortalyǵy bolady. Onda 140 tósektik stasıonar, úsh operasıalyq zal jáne úlken dıagnostıkalyq emhana ornalasady.
Medısınalyq jumys jónindegi ortalyq basshysynyń orynbasary, onkolog-hırýrg Ádilbek Muqajanov protondyq terapıany oryndaýǵa múmkindik beretin biregeı sıkrotron apparaty týraly aıtyp berdi.
"Bul Qazaqstan men Ortalyq Azıadaǵy proton terapıasy júrgiziletin jalǵyz ortalyq bolady. Álemde mundaı ortalyqtar 100-den aspaıdy. Olardyń biri bizde", - dedi ol.
Onyń aıtýynsha, sıklotron proton sáýlelerin shyǵarady jáne eki emdik tolqyn dep atalady, sonyń arqasynda eki naýqasty bir ýaqytta sáýlelendirýge bolady.
"Bul proton terapıasynyń ereksheligi - fotondy syzyqtyq údetkishterden aıyrmashylyǵy, munda sáýlelený dál jáne jumsaq bolady. Bul ásirese balalar men álsiregen naýqastardy emdegende óte mańyzdy ról atqarady", - deıdi Ádilbek Muqajanov.
Álıhan Smaıylov densaýlyq saqtaý mınıstrligine bas merdigermen birlesip, 2024 jyldyń 1 tamyzyna deıin protondy terapıa ortalyǵyn iske qosýmen nysandy paıdalanýǵa berýdi tapsyrdy.