50 eldiń azamattary konsertke bılet alypty.
23 qyrkúıekte Almaty qalasynda ánshi Dımash Qudaıbergenniń Stranger atty alǵashqy jeke konsertin beredi, dep habarlaıdy Almaty-akshamy.kz Almaty.tv silteme jasap.
«Bul - meniń ońtústik astanada uıymdastyrylatyn alǵashqy jeke shyǵarmashylyq keshim. Shoý Qazaqstandaǵy eń iri sport ǵımarattarynyń biri - Ortalyq stadıonda ótedi. Qurmetti tyńdarmandarymmen týǵan elimde qaıta kezdesetinime qýanyshtymyn», – dedi Dımash Qudaıbergen.
Qazir ánshiniń Almatynyń ortalyq stadıonynda ótetin jeke án keshine arnalǵan bıletterdiń 90 paıyzy satylyp ketken. Almatyǵa ánshiniń sheteldegi tyńdarmandary da kóptep kelip jatyr. Qolda bar derekke qaraǵanda, qazirdiń ózinde 21 myńnan astam bılet satylǵan. Bul – jalpy bılet sanynyń 90%. Ol tek konsert ótetin Ortalyq stadıondaǵy negizgi oryn ǵana. Odan bólek fanattar aımaǵynda, ıaǵnı sahna aldynda taǵy 10 myńǵa jýyq kórermen konsertti tamashalaı alady.
Onlaın bılet satatyn kompanıanyń bas dırektory Vıktorıa Torgýnakovanyń aıtýynsha, bılettiń baǵasy 8-10 myń teńgeden bastalyp, sahnaǵa jaqyn oryndardyń baǵasy 40 myń teńgege deıin jetti.
«Qazir fanaımaqta 10 myń teńgelik jáne qymbat oryndardyń bıletteri ǵana bar. Bılet satylymǵa shyqqan kúnnen beri satyp alýshylardyń sany artyp jatyr. Álemge tanymal óner ıesiniń sheteldik jankúıerleri de az emes. Satylǵan bıletterdiń 5 myńǵa jýyǵyn ózge eldiń tyńdarmandary satyp alǵan. Shveısarıa, Fransıa, Ýkraına, Qytaı, Katar, AQSH, Brazılıa jáne Argentına syndy jalpy sany 50 eldiń azamattary konsertke bılet alypty. Tipti birqatar qonaq úılerde qazirdiń ózinde bos oryn qalmaǵan», – dedi ol.
Almaty qalalyq týrısik aqparattyq ortalyq dırektorynyń orynbasary Baýyrjan Pazylhaıyrdyń aıtýynsha, ánshiniń konsertine bıletter 14 shildeden bastap saýdaǵa shyǵarylǵan. Alǵashqy eki táýlikte 10 myńnan asa bılet satylypty. Sondyqtan Dımash Qudaıbergenniń konserti kórermenniń kóptigimen rekord jańartýy múmkin.
Dımash Qudaıbergenniń jeke konserti 23 qyrkúıek kúni keshki saǵat 20.00-de Ortalyq standıonda bastalady.