Almaty kóshelerimen ótken «Kósh. Naýryz –dýman» merekelik kerýeni «Astan» alańyna jetip, merekelik shara odan ármen jalǵasýda. «Astana» alańynda ótken Naýryz merekesine kelýshilerdiń aldymen qaýipsizdigi saqtalǵan. Tártip saqshylary tarapynan qaýipsizdik sharalary oıdaǵydaı oılastyrypty.
Merekelik sharaǵa jıylǵan qala turǵyndary men qonaqtaryn Memleket basshysy Qasym-Jomart Toqaev Áz Naýryz meıramymen quttyqtady.
Naýryznama is-sharalary aıasynda negizgi konserttik baǵdarlamada otandyq dástúrli, sondaı-aq estrada ánshileri Kóktemdi beınelep, Naýryzdy naqyshtaǵan án-jyrdan shashý shashty. Án shyrqaǵandar arasynda álemge áıgili ánshi Dımash Qudaıbergen de boldy.
Jıylǵan jurtshylyq teatrlandyrylǵan kerýenmen júrip ótken bı, batyr, ańshy, búreitshi, ánshi, sal-serilerdi somdaǵan qyz-jigittermen sýretke túsip, máre-sáre bolyp jatyr. Qyzyqqan jurt búrkitshi, ańshylardyń qyrandarymen, tazy ıtterimen sýretke túsýde.
Meımandar aqshańqan kıiz úılerge bas suǵyp, qazaqtyń ulttyq taǵamdary -- qazy-qarta, jal-jaıadan aýyz tıip, qymyz-shubattan dám tatýda, sháı iship tańdaı jibitýde.
Kerýenge 1000-nan asa qyz-bozbala, jigit-jeleń batyrdyń, búrkitshi men aqyn retinde qatysqanyn atap ótken jón. Obrazdardy beınelegen ónerpazdar ishinde aq jaýlyqty analarymyz da, elýdi eńserip, alpysty alqymdaǵan jigit aǵalary da júrdi.
Qala turǵyndary men qonaqtary dóńgelekti kıiz úıler, qalyńdyq kúımesi, jibek, kilem, qamqa syndy matalar artqan túıelerdi, qazaq halqynyń jeti qazynasynyń nyshandaryn kórip, tańǵalǵany ras. Dýmandatyp qol soqqany da sodan bolar.
«Kósh. Naýryz – dýman» merekelik kerýeni kóńildi dýmanǵa ulasýda. Konsert júrgizýshiler de jıylǵan jurttyń ishinen jastardy áńgimege tartyp, qazaqtyń salt-dástúrinen tartatyn yrym-joralǵylardy surap, merekelik kóńil-kúıdi kóterýge tyrysýda. Naýryz-dýman kóterińki kúıde jalǵasýda. Kóńildi konsert kezinde Kókten nur jaýyp turdy. Muny da jaqsy yrymǵa baladyq.