Ánshi Dımash Qudaıbergen Almatydaǵy «Stranger» aýqymdy jeke konsertinen keıin Almaty Arena kesheninde jankúıerlerimen kezdesti, dep habarlaıdy Almaty-akshamy.kz Inform.kz-ke silteme jasap.
Kezdesýge álemniń túrli elinen ánshi ónerine tánti jankúıerleri kóp jınaldy. Mundaǵy kóńil kúı keremet boldy. Tyńdarmanǵa Dımash pen onyń dostary osy kezdesý úshin arnaıy daıyndaǵan qyzyqty baǵdarlama usynyldy. Án de aıtyldy, erekshe syılyqtar utysy da boldy.
Kesh júrgizýshileri – tanymal shoýmender Marat Oralǵazın men Erkebulan Myrzabek kezdesýdi suhbat túrinde ótkizdi. Ánshi Almatydaǵy alǵashqy konsertinen jáne Rım Papasymen kezdesýden alǵan áserimen bólisti. Ár jyldary sahnada ushyraǵan qyzyqty oqıǵalaryn aıtyp, syryn da jasyrmady.
«Keshegi konsertimniń ár sekýndy esimde. Bul óte keremet kesh boldy. Jankúıerlerimniń qoldaýyn qatty sezindim», - dedi Dımash.
Osy kezdesýge Bolgarıadan arnaıy kelgen Andjela esimdi alty jasar balaqaıdyń sahnadaǵy qylyǵy kópshilikti súısintti. Kishkentaı tyńdarman súıikti ánshisin qatty qushaqtap, uzaq ýaqyt jibermedi.
Jınalǵandardyń deni Dımashtan án aıtyp berýdi, keıbiri tipti ánurandy oryndaýyn surady. Aqsaqaldardyń biri ánshiniń shyǵarmashylyǵyna rızashylyǵyn bildirip, onyń nege kúzetsiz júretinin surady. Dımash ózin qaýipsiz sezinetinin, sondyqtan kúzettiń qajettiligi joq dep sanaıtynyn jetkizdi. Alaıda, ózge elderge barǵanda sekúrıtı qyzmetin paıdalanatynyn aıtty.
Fanattardyń biri jeke ómiri týraly suraǵan edi, biraq ánshi bul saýaldy jaýapsyz qaldyrdy. Júrgizýshiler sahnaǵa ánshiniń ata-anasyn shaqyrdy. Olar Dımash týǵan kúndi eske alyp, onyń balalyq shaǵy men qyzyǵýshylyqtary týraly áńgimeledi. Ákesiniń aıtýynsha, «Dımash shyǵarmashylyq jolyn tańdamaǵanda, kásibı fýtbolshy bolýy múmkin edi».
Ánshiniń jankúıerleri onymen sýretke túsip, avtograf aldy. Sondaı-aq, syılyq bergen qyzdar da boldy.
Kezdesý sońynda Dımash ata-anasyna, týǵandaryna qoldaýlary úshin, fanattaryna jańa jetistikterge shabyttandyratyndary úshin alǵys bildirdi. Dostary, áriptesteri men komandasyna rahmet aıtty. Qazaqstandyqtardy týǵan tili men jerin súıýge, qurmetteýge shaqyrdy. Barsha jınalǵandarǵa densaýlyq, beıbitshilik pen jaqsylyq tiledi.
Sondaı-aq, kezdesý barysynda «Bir aspan tarıhy» kompozısıasyna túsirilgen álemdegi eń qymbat beınebaıan kórsetildi. Týyndy túsirilimine 300 adam qyzmet etken. 12 mınýttyq eńbek Jer sharyndaǵy adamdardyń birligin dáripteıdi. Bul joba boıynsha jumysty Dımash Qudaıbergenniń ózi úsh jyl buryn bastaǵan.
Buǵan deıin habarlaǵanymyzdaı, 23 qyrkúıek kúni Almatyda Dımash Qudaıbergenniń «Stranger» atty jeke konserti anshlagpen ótti . Bul – Dımashtyń Almatyda ótkizgen alǵashqy konserti.
Dımash Qudaıbergeniń sheteldik tyńdarmandary ánshiniń konsertine arnaıy ushyp keldi. Olardyń kópshiligi Qazaqstan týraly áserlerimen bólisti.
«Qazaqstanǵa alǵash ret kelip otyrmyz. Alǵan áserimiz keremet. Mundaǵy tabıǵat óte ádemi, tamaǵy dámdi, onyń ústine jylqy etin jep kórdik. Biz Almatyda Kók bazar, Kóktóbe men Kólsaıǵa bardyq, endi Medeýge barmaqshymyz», - dedi Slovakıadan kelgen qonaqtar Iaroslava men Inna.