Elordada shahmattan álem chempıony ataǵy úshin reseılik Ian Nepomnáshıı men qytaılyq Dın Lıjen arasyndaǵy machtyń 12-shi partıasy ótip jatyr.
Atalǵan partıany álemge belgili ánshi Dımash Qudaıbergen sımvolıkalyq júris jasap, bastap berdi. Keıin QazAqparat tilshisiniń saýalyna jaýap bergen óner ıesi machqa qatysty óz pikirimen bólisti, dep habarlaıdy Almaty-akshamy.kz QazAqparatqa silteme jasap.
«Osyndaı sharaǵa shaqyrǵanyna óte qýanyshtymyn. Shetelden kelgen qonaqtarǵa «qosh keldińizder!» dep aıtamyn. Ózim shahmat oınaı qoımaımyn. Biraq bul men úshin úlken mártebe boldy», - dedi Dımash Qudaıbergen.
Eske salaıyq, 9 sáýirde atalǵan qos sportshy arasyndaǵy machty Halyqaralyq shahmat federasıasynyń (FIDE) prezıdenti Arkadıı Dvorkovıch pen Mádenıet jáne sport mınıstri Asqat Oralov bastap bergen edi.
Reglamentke sáıkes, álem chempıony ataǵy úshin mach 14 partıadan quralǵan. Teń esep tirkelgen jaǵdaıda 4 partıadan turatyn taı-breık belgilenedi. Eger taı-breıkte de jeńimpaz anyqtalmasa, shahmatshylar blıste sheberlik baıqasady. Odan ári «ólim partıasy» bar.
Shahmattan álem chempıonaty Astanada 7 sáýir bastalǵan bolatyn. Onda reseılik Ian Nepomnáshıı (FIDE) men qytaılyq Dın Lıjen álem chempıony ataǵyna talasyp jatyr.