Qarý urlaý jáne saqtaý faktisi boıynsha 519 tergeý amaly júrgizildi
Qańtardaǵy jappaı tártipsizdikterge A.Jumageldıevtiń (Dıkıı Arman) «Qazaqstandyq» jáne «Aıshýaq-Jantúgel» toptarynyń qatysy bary anyqtaldy. Bul týraly QR Bas prokýratýrasy 1 qyzmet bastyǵynyń orynbasary Eldos Qılymjanov málim etti, dep habarlaıdy Almaty-akshamy.kz QazAqparatqa silteme jasap.
«Buǵan deıin habarlanǵanymyzdaı, quzyrly organdar qańtardaǵy jappaı tártipsizdikke qylmystyq top músheleriniń qatysqanyn anyqtady. Ol - Arman Jumageldıevtiń (Dıkıı Arman) «Qazaqstandyq» jáne «Aıshýaq-Jantúgel» toptary. Olardyń qylmystyq áreketinen azamattar zardap shekti, qaza bolǵandar da bar. Uıymdasqan qylmystyq toptyń 24 múshesi jazaǵa tartyldy», - dedi Eldos Qılymjanov ortalyq komýnıkasıalar qyzmeti alańynda ótken baspasóz máslıhatynda.
Sondaı-aq, Bas prokýratýra ókili jappaı tártipsizdikter kezinde urlanǵan qarýǵa qatysty málimetpen bólisti.
«Qarý urlaý jáne saqtaý faktisi boıynsha 519 tergeý amaly júrgizildi. Ol boıynsha 183 tulǵa kúdikke ilinip, 154 adam sottaldy. Jappaı tártipsizdikter kezinde 10 ańshylyq dúkeni tonalyp, ol jerden 1 672 myltyq urlandy. Odan bólek, 1 288 qyzmettik qarý qoldy boldy. Urlanǵan qarýlardyń úshten biri (958 qarý) tabyldy. Búginde 2 myńnan astam qarý áli bógdeniń qolynda. Onyń qatarynda granatalar, avtomattar, myltyqtar, tapanshalar men granata atqyshtary bar. Sonymen qatar azamattar óz erkimen 119 qarýdy tapsyrdy», - deıdi ol.
Aıta keteıik, atalǵan vedomstvo qańtar oqıǵasy kezinde 238 adamnyń qaza tapqanyn taǵy bir naqtylady.