QR İİM-niń uıymdasqan qylmysqa qarsy kúres departamenti Bas prokýratýranyń úılestirýimen jetekshisi «qańtar oqıǵasyna» belsendi qatysqan Arman Jumageldıev uıymdasqan qylmystyq tobyn áshkereleýge jáne joıýǵa baǵyttalǵan is-sharalar keshenin júrgizýde, dep habarlaıdy Almaty-akshamy.kz Polisia.kz-ke silteme jasap.
«Uıymdasqan qylmystyq toptyń jetekshisi men negizgi qatysýshylary qamaýǵa alynǵanyna qaramastan, onyń basqa músheleri advokattardyń qyzmetterin qarjylandyra otyryp, quqyqqa qarsy qyzmetpen aınalysýyn jalǵastyrýda. Tergeý prosesiniń qatysýshylaryna buqaralyq aqparat quraldary jáne ınternet jelisi arqyly qysym kórsetip jatyr», - delingen habarlamada.
Ázirlengen josparǵa sáıkes atalǵan toptyń qylmystyq áreketiniń jolyn kesý úsh kezeńde júrgizildi. Birinshi kezeń halyqaralyq izdeýde júrgen, qylmystyq ortada «Noıs» degen laqap atymen belgili Jumageldıevtiń «oń qoly» basqaratyn uıymdasqan qylmystyq toptyń negizgi krımınaldyq býynyn joıýǵa baǵyttaldy.
Máselen, 19 sáýirde Almaty qalasynyń, Almaty, Túrkistan, Shyǵys Qazaqstan jáne Pavlodar oblystarynyń aýmaǵynda aýyr qylmystardy jasaýǵa, onyń ishinde 2018 jyly Almatyda bolǵan adam óltirýge oqtalýǵa qatysy bar uıymdasqan qylmystyq toptyń 12 múshesi ustaldy.
«Ekinshi kezeńde krımınaldyq ortada «Karas» laqap atymen belgili «Dıkıı Armannyń» taǵy bir kómekshisi baqylaıtyn uıymdasqan qylmystyq topty qarjylandyrý arnasy joıyldy. 25-26 sáýir aralyǵynda Almaty, Shymkent qalalarynda jáne Túrkistan oblysynda 130-dan astam tintý júrgizilip, zańsyz oıyn bıznesine jáne atalǵan uıymdasqan qylmystyq topty qarjylandyrýǵa qatysy bar 53 fıgýrant ustaldy. Osy jedel-tergeý is-sharalarynyń nátıjesinde uıymdasqan qylmystyq top qurǵany jáne ony basqarǵany úshin Qylmystyq kodekstiń 262-baby boıynsha eki qylmystyq is tirkeldi. Mamyr aıynda qylmystyq toptyń qyzmetin qarjylandyrý faktisi boıynsha Qylmystyq kodekstiń 266-babymen qosymsha sotqa deıingi tergep-tekserý bastaldy», - deıdi İİM ókilderi.
12 shildede İİM uıymdasqan qylmysqa qarsy kúres departamenti Bas prokýratýranyń vedomstvoaralyq jedel-tergeý tobymen birlese otyryp, operasıanyń úshinshi kezeńin iske asyrdy. Sonymen qatar Astana, Almaty, Shymkent, Aqtóbe, Qostanaı jáne Túrkistan qalalarynda «qańtar oqıǵasy» kezinde Almaty qalasyndaǵy jappaı tártipsizdikke belsendi qatysqan 18 fıgýrantty ustady. 36 tintý is-sharasy júrgizilip, birneshe sholaq qarý, tapanshalar, pyshaqtar, kastet, dinı ádebıet, sondaı-aq tártipsizdikke qatysqan kúdiktilerdiń kıimderi tárkilendi.
«Osy baǵyttaǵy jedel is-sharalar jalǵasýda. Ózge málimetter tergeý múddesinde jarıalaýǵa jatpaıdy», – dedi İİM uıymdasqan qylmysqa qarsy kúres departamentiniń basqarma bastyǵy Qýandyq Alpys.