Túrkıaǵa em izdep barǵan otandastarymyzǵa demeý bop júrgen qandastar bar.
Ystambulda turatyn qandasymyz Nurabdýllah Jádik emine shıpa izdep, sharq urǵan jandardy barynsha qoldap, qoljetimdi qyzmet alýǵa kómektesedi, dep habarlaıdy Almaty-akshamy.kz 24.kz-ke silteme jasap.
Negizgi kásibi zańger bolǵanymen, medısına salasyna qatysty jaıttardy jetik meńgergen. Tarıhı otanynan kelgenderge kómekti ultyna degen qurmet dep biledi.
Qandasymyzdyń úsh qabatty úıi bar. Eski bolsa da, qalanyń qaq ortasynda ornalasqan. Úı ıesi Nurabdýllah Jádik Túrkıada týyp-ósken. 25 jyldan beri zań salasynda jumys isteıdi. Ata-anasy osydan 70 jyl buryn Anadoly jerine qonys aýdarǵan. Ákesinen qalǵan múlikti ultynyń paıdasyna jaratyp júr. Bul jerdi Abdýl Boldyrǵan Jadık úıi dep ataǵan. Nurabdýllahtyń meımandardan bir ǵana qalaýy bar. Ol - baqılyq bolǵan ata-anasyna quran baǵyshtap, ıman keltirý.
«Bul úıdi tegin ákem salǵan. Onda 5 jyl buryn jóndeý jumysyn jasadym. 4-5 jyl bolyp qaldy. 50-60-taı kisi osynda qonaqtap ketti. Joǵarǵy qabatynda ápkem turady. Eki qabatynda emdelýge kelgender qalady. Bala- shaǵasymen kelsin, kimmen kelse de, kelsin. Ózi osy jaqta turady. İshki jaqqa ákem men sheshemniń atyn jazyp qoıdym», - deıdi qandas Nurabdýllah Jádik.
Bul úıde emdelýge kelgen kez kelgen qazaq aqysyz turaqtaı alady. Birneshe jatyn bólme, jyly tósek bar. Odan bólek, teledıdar tamashalap, tynyǵatyn jáne as ázirleıtin múmkindik qarastyrylǵan.
«Ultymyz qazaq bolǵannan keıin «Áke kórgen oq jonar, sheshe kórgen ton pisher» deıdi. Biz áke-sheshemizden bir-birimizge kómektesýdi úırendik. Tek Túrkıada emes, dúnıede tarydaı shashylǵan qazaq bar ǵoı. Olarǵa bizdiń qandaı paıdamyz bolady? Qandaı kómegimiz bolady? Qolymyzdaǵyny birge bólip jemesek, paıdalanbasaq, qazaq degenimiz atymyz qaıda»? - deıdi qandas Nurabdýllah Jádik.
Shetel asyp, dertine daýa izdegen janǵa Nurabdýllahtyń ápkesi de jol kórsetip, jón silteıdi.
«Kelerde keıde jol taba almaı qalady. Keıde baratyn jerine jalǵyz bara almaıdy. Sonda maǵan birge baraıyq pa deıdi. Birge baramyz. Úıde keıde tamaq isteýge shamalary bolmaıdy. Sonda tamaq istep qoıamyn. Kelinim bar. Keıde úıdi tazalap ketedi. Olardyń aýyryp, aýrýhanaǵa baryp-kelip júrgende shamasy kelmeı qalady», - deıdi ápkesi Nurılla Jádik.
Jalpy, Túrkıada jylyna tek 400-den astam sheteldikke tegin emdelý úshin kvota bólinedi. Biraq bul múmkindikke kóbiniń qoly jete bermeıdi. Basty talap – dertine elinde daýa tabylmaǵany jónindegi anyqtama kórsetý.
«Shetel azamattarynyń Túrkıada emdelýine zań shyǵarylǵan. Qazaqstannan keletin qazaqtardyń paıdalanýyna tilektespiz. Bul úshin «Meniń aýrýyma Qazaqstanda em tabylmady» degen emhanadan qujat alyp, onymenen túrik konsýldyǵyna barsa bolady. Bul zańdy qazaqstandyqtar da bilip, qandas baýyrlarymnyń osynda emdelýine paıdamyz bolsyn dep aıta keteıin dedim», - dedi Nurabdýllah Jádik.
«Olar Anadoly jerine saýyq izdep, saıran qýyp kelmeıdi. Biz dertine daýa izdegenderdi birden tanımyz», - deıdi qandasymyz. Soǵan saı peıilin de taryltpaýǵa tyrysady. Ystambulǵa kórshiles jerde tursa da, úlken shańyraqqa jıi at basyn buryp, qonaǵyn tórge ozdyryp, qurmetin kórsetedi.