Májilis depýtaty Ermurat Bapı búgingi jalpy otyrysta Atyraýda tórt qyzdyń tumshalanyp, arabsha jazýy bar memlekettik tý ustap túsken sýretine qatysty másele kóterdi.
Ol Bas prokýror B.Asylovqa saýal joldap, bul oqıǵany jan-jaqty zertteýdi talap etti, dep habarlaıdy aqshamnews.kz.
Depýtattyń aıtýynsha, qyzdar ustaǵan kók týdaǵy arab qarpindegi jazý arnaıy baspa quralymen óte sapaly túrde tańbalanǵan. Sondyqtan bul oqıǵa tek turmystyq buzaqylyq nemese ádepsizdik qana emes, memlekettigimizge, ulttyq dástúrimiz ben biregeıligimizge jasalǵan ashyq ári maqsatty qarsylyq retinde qarastyrylýy kerek. Ol mundaı zań buzýshylyqtar qatań ári buljytpaı jazalanýy tıis ekenin atap ótti.
Sonymen birge, Ermurat Bapı bul tórt qyz áldebir arandatýshy toptyń qurbany bolýy múmkin ekenin eskertti. Olardyń mundaı áreketke jastyq albyrttyqpen, materıaldyq qyzyǵýshylyqpen nemese dinı saýatsyzdyq saldarynan barýy yqtımal. Sondyqtan eń aldymen osy áreketti uıymdastyrǵan jáne baǵyttaǵan kúshterdi anyqtap, jazaǵa tartý qajet dedi.
Depýtat sonymen qatar Wildberries Russ marketpleısinde túri burmalanǵan Qazaqstan týynyń erkin satylyp jatqanyn málimdedi. Bekitilgen standartqa saı kelmeıtin, resmı sıpaty ózgertilgen memlekettik rámizderdi saýdaǵa shyǵarǵan oryndardy jaýapqa tartýdy jáne satylǵan týlardy jınap, joıýdy talap etti.
Sondaı-aq, Ermurat Bapı zańnamaǵa túzetýler engizip, ulttyq biregeılikke nuqsan keltiretin, qoǵamdy jikke bólýdi kózdeıtin taýarlardy satatyn marketpleısterge qarsy sanksıa salýdy usyndy. Memleket radıkaldy aǵymdardyń zańǵa qaıshy áreketterine baqylaýdy kúsheıtip, dinı qundylyqtardy burmalaýǵa qarsy sharalardy qatańdatýy qajet ekenin aıtty.
Ol ulttyq biregeılikti qorǵaý saıasatyn júıeli túrde qalyptastyrýdyń ýaqyty jetkenin atap ótti. Bul maqsatta zaıyrly bilim berý júıesin nyǵaıtyp, mektepterdegi dintaný sabaqtaryn ulttyq mura negizinde júrgizý baǵdarlamasyn ázirleýdi usyndy. Sonymen qatar, ulttyq mádenıetti damytýǵa, dástúrli kıim kıýdi nasıhattaýǵa jáne jastar arasynda keń aýqymdy túsindirý jumystaryn júrgizýge tıisti memlekettik organdardy shaqyrdy.