Konstıtýsıalyq reforma aıasynda qabyldanyp jatqan árbir norma bolashaq urpaqtyń erkin de ádiletti qoǵamda ómir súrýine tikeleı áser etedi. Bul pikirdi Parlament Májilisiniń depýtaty, «Aýyl» partıasy fraksıasynyń jetekshisi Serik Egizbaev Konstıtýsıalyq reforma komısıasynyń úshinshi otyrysynda aıtty.
Depýtat konstıtýsıalyq reforma arqyly «Halyq únine qulaq asatyn memleket» tujyrymdamasynyń zańdy irgetasyn qalanyp jatqanyn atap ótti.
«Tarıhqa úńilsek, babalarymyz «Jeti jarǵyny» qabyldaǵanda da, Kúltóbeniń basynda kúnde keńes qurǵanda da, basty maqsat – eldiń tutastyǵy men ádildigi bolǵan. Búgingi bizdiń saıası reformadaǵy negizgi mindetimiz – halyqtyń múddesin qorǵaıtyn, ýaqyt synyna tótep beretin minsiz zańnamalyq júıe qurý. Bul − jaı ǵana qujattardy retteý emes, bul − el taǵdyryn sheshetin jaýapty qadam», - dedi Serik Egizbaev.
Onyń pikirinshe, qabyldanyp jatqan árbir norma bolashaq urpaqtyń erkin de ádiletti qoǵamda ómir súrýine tikeleı áser etedi. Osy joldaǵy eń basty strategıalyq qadam − birpalataly Parlament modeline bet burý jáne saılaý júıesin tolyq proporsıonaldy negizge, ıaǵnı partıalyq tizimderge kóshirý bolmaq.
«Buryn depýtat jeke tulǵa retinde ǵana jaýapty bolsa, endi ol úlken saıası uıymnyń, naqty ıdeologıa men partıalyq baǵdarlamanyń atynan sóıleıdi. Memleket basshysynyń óz kvotalarynan bas tartyp, ókilettilikterdi Parlamentke berýi − saıası partıalarǵa artylǵan úlken senim ári zor jaýapkershilik», - dep tolyqtyrdy depýtat.
Qańtar aıynda «Aýyl» partıasynyń depýtattyq toby barlyq 20 óńirdi aralap, sharýalarmen kezdesken.
«Tipti eń shalǵaı aýyldardyń ózinde turǵyndar Parlament pen Úkimettiń jumysyna muqıat nazar aýdaryp otyr. Al Konstıtýsıalyq reforma boıynsha túsken eki myńnan astam usynys — jaı ǵana statısıka emes. Bul — qoǵamnyń jańarýǵa, demokratıalyq bastamalardy kúsheıtýge jáne ádildikke degen tikeleı suranysy. Halyq kútip otyr, halyq senip otyr jáne bul úmitterdi aqtamaýǵa quqymyz joq. Halyqtyń amanaty bizden quqyqtyq júıeni jańartyp qana qoımaı, oǵan túbegeıli jańa, zamanaýı mazmun berýdi talap etedi», - deıdi Komısıa múshesi.
Sonymen birge, Májilis depýtaty ekologıalyq qundylyqtardy Ata Zań deńgeıinde ulttyq basymdyq retinde bekitýdi, Konstıtýsıa preambýlasyn jańa redaksıada qabyldaýdy, 31-bapqa azamattardyń tabıǵatty saqtaý mindetin engizýdi jáne 61-bap boıynsha ekologıany qorǵaý zańdaryn retteý quzyretin nyǵaıtýdy usynyp otyr.